VOV4.Bahnar - Kơsơ̆ năr 9/2, ƀok Khuất Việt Hùng, Kơ iĕng Kơdră chĕp pơgơ̆r Dơnŏ anĭh vei lăng sơđơ̆ng Trong nơnăm tĕh đak atŭm hăm khŭl bơ̆ jang hlôi năm bơ̆ jang tơ̆ dêh char Gia Lai vă dăr lăng, iung jang hơdoi hăm kơdră tơring pơrô̆ iung jang hơmet pơ ‘lơ̆ng sar bar trong nơnăm kơtang hlŏh pơm ăn 6 ‘nu bơngai lôch, 3 ‘nu bơngai rơka lơ̆m pơgê hrôih năr 9/2.

Lăp đơ̆ng rŏng gre tơtơ̆m hơlŭk, tang măt ăn Dơnŏ anĭh vei lăng sơđơ̆ng trong nơnăm dêh char Gia Lai hlôi năm ngôi, pơtrŭh nơ̆r vang ơ̆h sơ ‘ngon păng tơgŭm djru 3 trĭu hlak jên lơ̆m 1 ‘nu bơngai rơka, mĭnh ŭnh hnam đei bơngai lôch răm ‘nŏh 5 trĭu hlak jên. Apŭng Đak Đoa jei tơgŭm ăn 3 triu hlak jên ăn 1 ‘nu rơka păng 5 trĭu hlak jên ăn ŭnh hnam đei bơngai lôch. Lăp đơ̆ng rŏng jơ bơ̆ jang, Khŭl bơ̆ jang kơ Dơnŏ anĭh chĕp pơgơ̆r vei lăng sơđơ̆ng trong nơnăm Tĕh đak hlôi trŭh năm hơpong ŭnh hnam đei bơngai lôch lơ̆m ‘măng gre tơtơ̆m hơlŭk kơtang au, hơlêm jơhngơ̆m hơdrin yak hlŏh ơ̆h ol, erĭh sa sơđơ̆ng.

Tơblơ̆ nơ̆r: Amazưt