VOV4.Bahnar - Tơdrong jang đe drŏ kăn tơgŭm dĭh băl jang sa hlôi đei rim khul Drŏ kăn tơ̆ Lâm Hà, dêh char Lâm Đồng tơlĕch jang jơnei, tơgop tơgŭm rim drŏ kăn lơ̆m khŭl atŏk tơ iung mŭk drăm, hơdrin pơm pơdrŏng.

Trong jang pơtăm lagim lơ̆m hnam pơnĭl tơ̆ tơring Phi Tô, apŭng Lâm Hà

Trŭh dang ei, Khŭl drŏ kăn apŭng Lâm Hà hlôi jang hơdoi hăm Dơnŏ anĭh Mong jên tơgŭm djru Tơpôl, Dơnŏ anĭh mong jên chŏh jang sa păng atŏk tơ iung tơring tơrang tơgŭm djru drŏ kăn tŏk iŏk, tơmơ̆t jang sa iŏk yua kơ jăp. Đơ̆ng au, hlôi đei hlŏh 5.000 ‘nu drŏ kăn tŏk iŏk hlŏh 140 ti hlak jên; vei kơ jăp 107 khŭl pơkom păng tok iŏk jên jang sa hăm hlŏh 4.000 ‘nu drŏ kăn vang pơkom hăm kon jên hlŏh 9 ti hlak jên. Hăm iŏk yua kon jên tŏk iŏk đei jơnei hlôi tơgŭm 480 ŭnh hnam dơnŭh kơ yuơ drŏ kăn pơm tơ ‘ngla yak hlŏh dơnŭh hin. Yă K’Soanh, Kơdră chĕp pơgơ̆r Khŭl drŏ kăn tơring Phi Tô, apŭng Lâm Hà tơbăt:“Lơ̆m atŏk tơ iung mŭk drăm tơ̆ tơring jei đei mĭnh ƀar ‘nu jang ‘lơng lơ̆m atŏk tơ iung mŭk drăm ŭnh hnam, erĭh sa sơđơ̆ng hlŏh pơtêng hăm ŭnh hnam anai. ‘Ngoăih kơ ‘nŏh dôm bơngai au oei băt, pơm kiơ̆ tang găn tơpŭ hơ ‘lơp lơ, băt jang kiơ̆ khoa hŏk kih thuơ̆t lơ̆m chŏh jang sa, nhen trong jang chŏh jang sa lơ̆m hnam hơdrau, hnam pơnĭl ... hơnhăk đei iok yua kơ jăp”.

Quốc Học – K’Yến/Amazưt tơblơ̆