Khei năr ou ki, tơrong tơlĕch jang kiơ̆ rim Tơdrong jang tơm teh đak iŏk đei jơnei hơ iă, tơgop kơtang lơ̆m atŏk tơ iung mŭk drăm-tơpôl kơ teh đak. Tơdrong jang tơm teh đak tơ iung pơjing tơring tơrang ‘nao, Tơdrong jang tơm teh đak tơjur dơnuh kơjăp ‘lơ̆ng (jăl jang 2021 - 2025) hlôi jang keh đang ‘lơ̆ng; Tơdrong jang teh đak atŏk tơ iung mŭk drăm-tơpôl tơring kon kông păng groi kông jăl I (2021-2025) hlôi keh đang 6 lơ̆m 9 trong tơlĕch jang. Pơma hơdăh, dôm tơdrong kơ 3 Tơdrong jang tơm jei tơklep hăm atŏk tơ iung tơring choh jang sa, hơrih sa, trong hnam, dôm bơngai dơnuh păng hơmet pơ ‘lơ̆ng tơdrong hơrih sa tơring choh jang sa groi kông, rim nơ̆r tơgop akhan, tơdrong hơgrop 3 Tơdrong jang tơm ‘noh tôch trŏ lăp, sơđơ̆ng ‘lơ̆ng hơ iă lơ̆m pơrô̆ jang, akŏm đei khul jang, pơm hơtŏk jơnei kon jên tơmơ̆t jang, lăp mĭnh nơ̆r găh trong tơlĕch jang, trong tơmơ̆t jên jang, trong pơtho tơbăt dăr lăng, adoi pơm dă ƀiơ̆ đei tơdrong gơgrop dih băl, pơm hơtŏk iŏk đei jơnei iŏk yoa kon jên teh đak tơmơ̆t jang. Trong pơjing hơgrop jang, Kơ iĕng Thủ tướng Teh đak Nguyễn Hòa Bình athei vei kơjăp rim trong jang, khul tơgum, trong jang tơgŭm hlôi đei Kuô̆k hô̆i kĭ tơchơ̆t hăm 3 Tơdrong jang tơm, khei ‘năr jang kiơ̆ đunh truh sơnăm 2035; lăp hơmet pơ ‘lơ̆ng dôm tơdrong hơgrop păng Tơdrong jang ‘nao ưh kơ kăl pơjing dơ̆ng, ưh kơ kăl kĭ tơchơ̆t dơ̆ng. Hơnih bơ̆ jang pơrô̆ chĕp pơgơ̆r jang kơ 3 Tơdrong jang tơm ou ‘noh Khul kơdră chĕp pơgơ̆r Teh đak; Hơnih tơm jang jên hu pơm hơnih chĕp pơgơ̆r atŭm.