Dêh char Đăk Lăk pơtơm ming man Hnam trưng Phôh thŏng teh đak rong 'me Jăl kơđeh  - Trung hŏk kơ sơ xah Ea Bung. Tơdrong ming man đei kơsô̆ jên asong 250 tih hlj đơ̆ng jên Trung ương păng tơring asong, ming man lơ̆m hơnih teh să pơhlom 6 ha tơ̆ thôn 1. Ah keh đang, hnam trưng gô asong mah hơnih hŏk pơhrăm, hơrih oei xa ăn hloh 1.300 hŏk tro kon kông tơ̆ tơring sơlam. Xah Ea Bung đei pơjing kiơ̆ tơmơ̆t hơdai đơ̆ng tơring Ea Bung păng Ya Tờ Mốt (so), tơring teh să, kon pơlei oei xa rah rai, tơdrong vih vơ̆t hŏk pơhrăm kơ đe hŏk tro, mă hăt noh ah pơyan 'mi, oei ƀơm lơ tơnap tap. Tơdrong asong ming man hnam trưng hŏk oei hơdai đei lăng jing tơdrong tơplih hơtŏk pơ-'lơ̆ng tơdrong pơtho pơhrăm tơ̆ tơring sơlam teh.

Dêh char Lâm Đồng pơgơ̆r tơlĕch jang man 3 hnam trưng 2 jăl tơ̆ dôm xăh sơlam ‘noh Tuy Đức, Thuận Hạnh păng Đăk Wil. 3 hnam trưng teh đak rong 2 jăl đei akŏm jên pơm dang 675 ti hlak jên. Tơdrong jang ming man kơ̆p III, hăm dôm hnam kơjung đơ̆ng 1 truh 3 tơ̆ng. Khei ‘năr man đơ̆ng khei 3/2026 truh khei 8/2027. Mưh et hơtŏk, dôm hnam trưng gô sơng iŏk hloh 4.000 ‘nu hŏk tro đơ̆ng jăl 1 truh jăl 2 ‘noh kon oh bơngai kon kông lơ̆m tơring.

Dêh char Quảng Ngãi pơgơ̆r lêh iung ming man Hnam trưng Phôh thŏng teh đak rong 'me jăl Kơđeh  - Trung hŏk kơ sơ tơ̆ 5 xah sơlam teh noh: Bờ Y, Ia Tơi, Ia Đal, Đăk Long păng Đăk Plô. Kơsô̆ jên asong ming man 5 hnam trưng ou noh hloh 1.100 tih hlj. Rim hnam trưng đei man lơ̆m hơnih teh să pơhlom 5 hectar, mah ăn đơ̆ng 700 truh 1.600 hŏk tro, trŏ hăm tơdrong kĕ đei kơ rim tơring. Dôm tơdrong jang đei pơkăp kiơ̆ hnam trưng hŏk oei hơdoi Jăl kơđeh – Trung hŏk kơ sơ, tơguăt hăm pơkăp 'lơ̆ng hnam trưng, lăm hŏk, tơjur ƀiơ̆ dôm hnam trưng rah rai iơ iĕ, vă pơjing hnam trưng hŏk oei hơdoi jăl Kơđeh – Trung hŏk kơ sơ tơ̆ dôm xah sơlam teh. Jăl mă 1, dêh char hlôi pơtơm man 4 hnam trưng tơ̆ dôm xah Rờ Kơi, Mô Rai, Sa Loong păng Dục Nông, hơmŏ gô keh đang ah khei 7/2026. Pơđĭ  5 Tơdrong ming man đei pơtơm man ah jăl mă 2 ou, kơchĕng gô keh đang ah khei 8/2027.