VOV4.Bahnar - Đơ̆ng rŏng 6 năr bơ̆ jang, kơ sơ̆ ‘năr 10/5, Hop akŏm ‘măng mă 5 Anih chĕp kơ̆l pơ gơ̆r Trung ương Đảng jăl XIII hlôi hop akŏm pơ tôch. 1 lơ̆m dôm tơ drong đei Tổng Bí thư Nguyễn Phú Trọng tôch kơ tơ rĕk truh lơ̆m ƀai iung pơ ma tơ̆ ‘măng pơ tôch ‘noh jĭ tơ drong kăl athei pơm mă đei tơ drong tơ plih pran kơ tang păng tơ pă hloh dơ̆ng lơ̆m tơ drong hơ tŏk ‘lơ̆ng tơ drong jang kĕ chĕp kơ̆l pơ gơ̆r, jơ hngơ̆m bơ̆ jang đơ̆ng anih jang đảng; păng vă bơ̆ jang kiơ̆ jơ nei tơ drong hơ găt, athei păng dôm hơ năp jang, trong jang tơ lĕch ăn.

Tổng Bí thư Nguyễn Phú Trọng pơ ma pơ tôch

Tổng Bí thư Nguyễn Phú Trọng athei, Anih pơ gơ̆r jang Trung ương păng rim anih jang Đảng, rim anih jang tơ gŭm tơ drong tơ̆ Trung ương kăl kơ jăh đei pơ tho pơ gơ̆r bơ̆ jang kiơ̆; dôm anih jang đảng dêh char, pơ lei tơm, rim đảng bộ găh Trung ương athei mă hơ bĕch hơ bal, kơ chăng pơm ‘lơ̆ng dôm tơ drong jang, tơ drong hơ găt, hơ năp jang păng trong jang mă Tơ chơ̆t đơ̆ng Trung ương hlôi tơ lĕch ăn. Tơ̆ hop akŏm, Anih chĕp kơ̆l pơ gơ̆r Trung ương hlôi drơ̆ng nơ̆r trong jang pơ jing Anih chĕp kơ̆l pơ gơ̆r kơ dêh char găh tang găn sa pơ jĭp ưh kơ ‘lơ̆ng.

Thuem: Tơ blơ̆