Năr 07/08, tơ̆ Anih jang kơ Jơnŭm pơgơ̆r teh đak, Thủ tướng teh đak bơ̆n Phạm Minh Chính pơgơ̆r tơdrong hop akŏm Jơnŭm pơgơ̆r teh đak ah khei 7. Hop akŏm đei pơdah trư̆k tuyê̆n hăm 34 dêh char, pơlei tơm oei lơ̆m Trung ương. Tơ̆ 'măng hop akŏm, Thủ tướng Phạm Minh Chính ră hơdah, jơ̆p teh đak hlôi tơlĕch jang kiơ̆ pơkăp jơnŭm pơgơ̆r 2 tăl; Drŭt tenh hơtŏk mŭk drăm đơ̆ng 8,3% păng tơjră hăm tơchơ̆t pơkăp thuê̆ 'nao đơ̆ng teh đak Mi.

Tơchơ̆t pơm kiơ̆  “puăn tơdrong jang dơnơm” kiơ̆ dôm Tơchơ̆t đơ̆ng Anih tơm Chĭnh trĭ; Hơmet ăn Hop akŏm Đảng dôm jăl, pơkăp truh Hop akŏm Đảng 'măng mă 14; Pơgơ̆r tơbăt 78 sơnăm Năr Linh jĭ rơka – Linh lôch tang ăn teh đak păng hơmet ăn Lêh tih tơbăt 80 sơnăm Kuôk khanh...; Tang găn păng tơjră hăm 'mi kial pơrăm, vei lăng sơđơ̆ng tơdrong hơrih, mŭk drăm kon pơlei, hơmet tenh tơdrong răm đơ̆ng 'mi kial đak hơbông pơm đei. Lơ̆m khei năr tơnap tap, gơnơm đei tơdrong hơdrin đơ̆ng tôm anih jang chinh trĭ, tơdrong mŭk drăm tơpôl pơtoi đei ƀôh tŏk 'lơ̆ng, khei đơ̆ng rŏng đei hloh kơ khei hơdrol, jô̆ hơlen 7 khei 'lơ̆ng hloh pơtêng hăm khei năr ou sơnăm 2024. Mă lei, Thủ tướng adoi tơƀôh hơdah dôm tơdrong tơnap tap; atŭm hăm noh pơgơ̆r rim anih jang tơm, rim tơring pơtoi pơm kiơ̆ dôm trong jang 'nao vă hơtŏk đei jơnei nhen tơchơ̆t đơ̆ng 8,3-8,5% lơ̆m sơnăm 2025. Sơkơ̆t hơdah tơdrong kăt tơjur hla bar hanh chinh tơnap tap, pơm trong hiôk ăn anih jang mŭk drăm, kon pơlei hơtŏk tơdrong jang mŭk drăm.