Dang ei rim tơ drong đei dêh char tơ lĕch jang ‘lơ̆ng, vă pơ vih ‘lơ̆ng hlŏh ăn tơ dỏng ‘mĕh vă chă tơ mang lăng đơ̆ng tơ moi. Hăm hơ năn "Đà Lạt – plt 4 pơ yan pơ kao", Festival pơ kao Đà Lạt ‘măng mă 9 sơ năm 2022 pơ gơ̆r đơ̆ng khei 11 truh đĭ khei 12 pơ gơ̆r tơ̆ lơ apŭng, plt lơ̆m dêh char.

Kŭm hăm 9 tơ drong jang tơm, lơ̆m nŏh đei hop akŏm Tơ lĕch tơ drong jang đơ̆ng Khul kơ dră tĕh đak bơ̆ jang kiơ̆ tơ drong Tơ chơ̆t 23 ‘năr 6/10/2022 đơ̆ng Anih tơm Chinh trĭ găh trong jang atŏk tơ iung mŭk drăm, tơ pôl, vei sơ đơ̆ng tĕh đak tơ̆ tơ ring Tây Nguyên truh sơ năm 2030, trong jang truh sơ năm 2045 păng tơ lĕch trong tơ mât jên jang tơ̆ tơ ring Tây Nguyên... Festival pơ kao Đà Lạt ‘măng mă âu oei đei lơ tơ drong jang ‘lơ̆ng vă sơng tơ moi truh, nhen: kơ phô̆ Hla che-chĕh phe-hơ lăk vang; lêh tơ păr Khinh khí cầu; Kơ chơ tĕch ‘nhot, pơ kao; Carnaval tơ̆ trong glung; Đà Lạt – Chă tơ mang lăng tơ̆ dôm pơ lei pơ kao; dôm hop akŏm, pơ ma nuh khoa hŏk, pơ dă tơ mam, kơ chơ tĕch mơ dro apŭng plenh tĕh.