Tơ̆ apŭng Lạc Dương, lơ̆m khei 11 âu gô pơgơ̆r 3 tơdrong akŏm kiơ̆ Festival Pơkao Đà Lạt ‘măng mă 9 xơnăm 2022. Hơdăh, năr 19/11, gô pơtơm Pơyan akŏm ‘Nhĕt nhiă Lang Biang. Tơ̆ âu pơrŏ 5 anih kơ dôm anih jang tơmang pơhiơ̆, atŭm hăm noh pơgơ̆r dôm tơdrong pơxuh pơchơt kră xơ̆, tơdrong jang Team Building tơrĕk truh akŏm joh ayŏ tơpôl kon pơlei  K'Ho. 

Năr 26/11, tơ̆ xăh Đạ Nhim gô pơgơ̆r Pơlong tơmam pai xa păng xik tơm Lang Biang ‘măng mă 1, hăm tơdrong akŏm đơ̆ng 6 khul. Adoi lơ̆m ‘măng âu, tơ̆ âu gô pơgơ̆r Tơdrong pơlong kơdâu axeh ưh đei an ‘măng mă 1, rơih iŏk 32 tŏ axeh kơdâu pơlong đơ̆ng 6 xăh, thĭ trâ̆n păng dôm anih jang mŭk drăm lơ̆m tơring. Ƀok Sử Thanh Hoài, Kơdră Anih vei lăng kon pơlei apŭng Lạc Dương, dêh char Lâm Đồng ăn tơbăt: tơdrong jang hơmet ăn 3 tơdrong akŏm kiơ̆ Festival Pơkao Đà Lạt ‘măng mă 9 xơnăm 2022 hlôi keh đang: “Pơm kiơ̆ tơchơ̆t tơlĕch đơ̆ng Anih vei lăng kon pơlei dêh char găh tơdrong mă dôm tơring lơ̆m dêh char athei vang jang dôm tơdrong pơkăp akŏm Festival pơkao Đà Lạt, apŭng Lạc Dương duh đei minh ƀar tơdrong jang vă pơm kiơ̆ pơkăp. Noh jing akŏm pơchơt ‘nhĕt nhiă gô vă pơgơ̆r ăh năr 19/11, atŭm hăm noh apŭng Lạc Dương duh pơgơ̆r pơlong pai xa, pơdreh chĭng chêng, jang atŭm hăm dôm anih jang mŭk drăm pơgơ̆r tơdrong pơlong kơdâu axeh ưh đei an tơ̆ xăh Đa Nhim”.

Dang ei, dôm anih jang tơmang pơhiơ̆ nhen nha hang, khăch sạn, anih tơmang pơhiơ̆... tơ̆ Lâm Đồng duh hlôi hơmet tôm tơdrong kăl vă vei xơđơ̆ng tơnăp ăn tơdrong kăl kơ tơmoi. Ƀok Đinh Thiên Long, tơ ‘ngla minh nha hang tơ̆ pơlei tơm Đà Lạt ăn tơbăt, vă pơm kiơ̆ pơkăp akŏm Festival pơkao Đà Lạt ‘măng mă âu, ‘nguaih kơ hơtŏk pơ ‘lơ̆ng tơdrong jong et xa, nha hang kơ ƀok hlôi kăp gĭt hơmet pai minh ƀar tơmam xa kăp gĭt pai đơ̆ng dôm hơdrĕch ‘nhot, plei ƀum đei adrô̆ kơ Đà Lạt: “Adrol kơ  Festival noh tơdrong mă blŭng nhôn athei keh đang kơjă kăp gĭt kơ minh nha hang găh tơdrong ‘lơ̆ng pai xa, găh rơgoh tơmam drăm xa vă xơng lơ tơmoi truh. Đà Lạt đei lơ tơmam drăm kăl pai xa, kơyươ noh inh ‘meh tơmoi gô đei hơlen lăng găh tơmam pai xa kơ kon pơlei tơ̆ pơlei tơm pơkao âu”.

Ƀok Tôn Thiện San, Kơdră Anih vei lăng kon pơlei pơlei tơm Đà Lạt, Kơdră Jơnŭm pơgơ̆r Festival pơkao Đà Lạt ‘măng mă 9 ăn tơbăt, dôm pơlei pơkao, cham char pơkao tơ̆ Đà Lạt hơnơ̆ng vei xơđơ̆ng pơkao guăng ‘lơ̆ng, ‘măn tơdrong kăl tơmang lăng đơ̆ng đe tơmoi: “Đà Lạt xơkơ̆t ưh adrô̆ Festival pơkao pơtơm đei pơkao, mă Đà Lạt jing pơlei tơm pơkao noh pơkao đei prăt xơnăm, rim bơngai pơtăm pơkao, rim hnam pơtăm pơkao. Dôm pơlei pơkao xơnăm âu duh đei tơmam drăm ‘măn ăn tơmoi kăl, pơtih nhen pơlei pơkao Vạn Thành gơh chă tơmang lăng ăh kơmăng. Minh ƀar tơdrong akŏm Festival pơkao gô pơdui đunh truh Têt, adoi đei pơkăp hơƀlih pơkao hơnơ̆ng păng pơkao ling lang guawng ‘lơ̆ng. Thoi noh, ‘nguaih kơ tơdrong akŏm ‘Dêh plenh Tây nguyên’ pơdui, rim cham char pơkao duh gô pơdui đunh truh Têt”.

Duh nhen dôm tơdrong akŏm Festival pơkao adrol ki, Festival pơkao  Đà Lạt ‘măng mă 9 hơyak kiơ̆ pơkăp pơih xă lơ̆m tơpôl, kơyươ noh lơ tơdrong akŏm đei dôm anih jang mŭk drăm, jơnŭm tơpôl, tơ ‘ngla chih măt pơm kiơ̆. Kiơ̆ kơ ƀok Đặng Trí Dũng, Phŏ kơdră Anih vei lăng kon pơlei dêh char Lâm Đồng, Phŏ kơdră Jơnŭm pơgơ̆r tơdrong akŏm Festival pơkao Đà Lạt, truh khei năr âu, dôm tơdrong akŏm adoi đei tơlĕch jang xơđơ̆ng păng trŏ nhen pơkăp, vei xơđơ̆ng ăn ‘măng akŏm Festival pơkao ‘lơ̆ng hơ iă tơnăp păng akŏm lơ tơdrong ‘lơ̆ng rŏ lơ̆m đon bơnôh tơmoi. Kiơ̆ đơ̆ng noh, tơgop hơtŏk kơtang tơdrong jang tơmang pơhiơ̆ păng hơtŏk pơ ‘lơ̆ng tơdrong erih joh ayŏ păng đon bơnôh kon pơlei tơ̆ tơring: “Truh khei năr dang ei noh pơm kiơ̆ ƀlep dôm tơdrong pơkăl duh nhen tơlĕch tơchơ̆t, găh khei năr, tơdrong kăl păng tơdrong hơmet tôm tong. Jơnŭm pơgơ̆r, păng 4 anih jang adoi tơlĕch pơm jang tơnăp hloh. Festival pơkao xơnăm âu pơkăp atŭm noh axong hơtŏ hơnơ̆ng, đei dôm tơdrong kăl jang đơ̆ng rŏng kơ Festival noh pơtoi iŏk jang; mă lei đei dôm tơdrong pơtih nhen tơdrong pơdăh tơmang joh ayŏ noh răk lơ̆m đon bơnôh tơmoi dôm tơdrong ‘lơ̆ng rŏ găh Đà Lạt, găh Lâm Đồng, găh kon bơngai, găh dôm tơmam drăm, lơ̆m noh đei dôm tơdrong kăl găh pơkao”.

Hăm hơnăn "Đà Lạt – pơlei tơm 4 pơyan pơkao", Festival pơkao Đà Lạt ‘măng mă 9 xơnăm 2022 pơgơ̆r đơ̆ng khei 11 truh đĭ khei 12 hăm cham char pơih xă jâ̆p apŭng, pơlei tơm lơ̆m dêh char. Atŭm hăm 9 tơdrong pơdăh tơm noh: cham pơdăh pơkao, tơdrong pơdăh joh ayŏ "Bảo Lộc – Hla che ƀâu phu, guăng rŏ", tơdrong pơdăh joh ayŏ kăp gĭt tơbang  Festival Pơkao Đà Lạt ‘măng mă 9 xơnăm 2022, pơdăh hơbăn ao hơnăn "Che lụa – Jăl trong mŭk drăm" păng cham char pơdăh "Dêh plenh Tây Nguyên", akŏm pơdăh pơkao păng tơm ‘long đei pơkao apŭng plenh teh, hop akŏm tơlĕch Tơdrong jang đơ̆ng Khul Kơpal teh đak pơm kiơ̆ Tơchơ̆t kơsô̆ 23 đơ̆ng Anih tơm Chĭn trĭ găh trong hơtŏk mŭk drăm tơpôl, vei xơđơ̆ng xơlam teh, xơđơ̆ng tơpôl tơring Tây Nguyên truh xơnăm 2030, xơkơ̆t truh xơnăm 2045 păng tơlĕch axong jang ăn tơring Tây Nguyên.