Pơma ăh lêh pơtơm Festival pơkao Đà Lạt ‘măng mă 9, Phŏ Kơdră teh đak bơ̆n Võ Thị Ánh Xuân akhan, đơ̆ng rŏng jê̆ 130 xơnăm tơ-iung pơjing păng hơtŏk, Đà Lạt – pơlei tơm kơ rơbâu pơkao ưh adrô̆ xơkơ̆t anih dơ̆ng jing anih tơm chĭn trĭ, mŭk drăm, joh ayŏ kơ dêh char Lâm Đồng, mă oei tơgop kăp gĭt lơ̆m hơtŏk tơring Tây nguyên tenh păng kơjăp xơđơ̆ng.

Festival pơkao Đà Lạt ‘măng mă 9 jing lêh akŏm ‘lơ̆ng kăp gĭt, đei tơrĕk truh trŏ tơdrong kăl, pôk bơnê răh găh tơdrong guăng ‘lơ̆ng kơdih kơ Đà Lạt, hơtŏk tơ-iung răh tơdrong pơm jang, tĕch pơdro păng tĕch pơkao, tơmam choh pơtăm ăn teh đak đe, hăm hơnăn hlôi đei pơkăp “Đà Lạt – akŏm tơdrong ‘lơ̆ng đơ̆ng teh grasia”. Phŏ Kơdră teh đak bơ̆n Võ Thị Ánh Xuân tơroi: “Tơchơ̆t kơsô̆ 23 đơ̆ng Anih tơm Chĭn trĭ hlôi xơkơ̆t pơlei tơm Đà Lạt jing hơgăt teh găh tơring Pơbăh Tây nguyên”. Tơdrong mă âu ăn ƀôh Đảng păng Khul Kơpal teh đak lui ngeh, xơkơ̆t, pôk bơnê kơ tơdrong kơ ‘nôh păng dôm tơdrong jang đei jơnei kăp gĭt mă  Đảng ƀô̆, jơnŭm pơgơ̆r tơring, kon pơlei rim hơdrung bơngai tơ̆ dêh char Lâm Đồng, pơlei tơm Đà Lạt hlôi jang đei jơnei lơ̆m khei năr âu ki. Inh lui ngeh, lơ̆m khei năr truh,  Đà Lạt – Lâm Đồng pơtoi chĕp vei tơnăp jơhngơ̆m pran kơ tơdrong tơguăt tơguăl kon pơlei, iŏk jang tơnăp dôm mŭk drăm, tơdrong pran kơ tơring, tơgop kăp gĭt lơ̆m tơdrong hơtŏk tơ-iung atŭm kơ tơring Tây nguyên păng jâ̆p teh đak”

Hăm hơnăn “Đà Lạt – Pơlei tơm puăn pơyan pơkao”, Festival pơkao Đà Lạt ‘măng mă 9 xơnăm 2022 jing tơdrong pơdjoi, xơkơ̆t, pôk bơnê kơ bơngai pơtăm pơkao păng tơbang dôm tơdrong kăp gĭt găh pơkao, găh dôm tơmam choh pơtăm mă đe ư ang păng hŭi kơ đei kơ Đà Lạt. Lơ̆m noh, tơdrong jang pơkao tơ̆ âu hlôi tơpă hơ-‘nhăk tơdrong pơyua tih tên, tơgop kăp gĭt lơ̆m tơdrong hơtŏk mŭk drăm – tơpôl atŭm kơ dêh char Lâm Đồng.

‘Măng akŏm kơchơ ‘nhot pơkao Đà Lạt hlôi tơpă pơih akŏm ăh jih dơnâu đak Xuân Hương, akŏm lơ tơmam choh pơtăm hŭi kơ đei kơ Đà Lạt – Lâm Đồng vă tơbang truh tơpôl bơngai. ‘Măng akŏm kơchơ hơvơn đei jê̆ 50 anih jang, tơ ‘ngla bơngai jang hăm 90 anih tĕch ‘nhot, pơkao, hla che, ka phê atŭm hăm dôm tơmam choh pơtăm kiơ̆ pơkăp OCOP, tơdrong pran kơ Đà Lạt – Lâm Đồng. Pơmai Trần Thị Thanh Tuyền tơroi:  “Inh juăt jang găh ‘nhot, ƀum, plei ‘long dôm tơmam kăp gĭt kơ Đà Lạt nhen hơmrĕ chuông, hla ƀei lôm brê, kơdĭm tei brê, ƀum ‘ngam, kân tei, lơ ‘nhot nai dơ̆ng. Jơnŭm pơgơ̆r tơgŭm tơnăp, hơdăh in ăn kơ inh kơƀang hơnăn, bơ̆ ăn anih ‘măn akŏm tơmam, inh adrô̆ ‘nhăk pơtruh tơmam pơdăh lang lap. Inh hơpơi ‘moih ‘nhăk tơmam kơ Đà Lạt năm tơbang vă lơ bơngai băt truh”

Ƀơ̆t ‘măng âu, Anih Kŏng thương dêh char Lâm Đồng jang atŭm hăm Anih vei lăng kon pơlei pơlei tơm Đà Lạt tơlĕch tơbang anih pơdăh, tơbang păng tĕch tơmam drăm đei hơnăn “Đà Lạt – akŏm tơdrong ‘lơ̆ng đơ̆ng teh grasia”. Truh dang ei, pơlei tơm Đà Lạt hlôi axong hla pơkăp hơnăn “Đà Lạt – akŏm tơdrong ‘lơ̆ng đơ̆ng teh grasia” ăn 768 anih jang, tơ ‘ngla bơngai jang, hăm 4 grŭp tơmam drăm noh: ‘nhot, pơkao, ka phê păng tơmang pơhiơ̆ choh jang xa. Hơnăn pơkăp âu roi năr roi đei lơ bơngai răt yua lơ̆m păng ‘nguaih kơ teh đak lui ngeh, dar deh tơbang hơdăh jing minh hơnăn pran kơtang. Ƀok Phan Ngọc Thạch, Kơdră Jơnŭm Pơgơ̆r Hơp tak xăh Tĕch pơdro choh pơtăm lơ tơmam drăm Sunfood Đà Lạt ăn tơbăt:  “Nhôn rơih iŏk tôm tơmam adoi đei tơm a hla chă hơdăh, tơmam đei Anih Kŏng thương xơkơ̆t noh pơtơm akŏm tĕch ăn bơngai răt yua. Atŭm hăm noh, vă tơbang hơnăn pơkăp ăn dôm anih jang mŭk drăm nhôn hlôi pơjing minh tơdrong pơkăp QR Code, jang hadoi păng tơbang lơ̆m dôm trang tơroi tơbăt, atŭm hăm noh nhôn tŏk bŏk jang hadoi hăm taxi, nha hang truh dôm khăch san vă tơbang um rŭp jâ̆p hnam sunfood âu truh hăm tơmoi”

Jơnŭm pơgơ̆r Festival pơkao Đà Lạt ‘măng mă 9 xơnăm 2022 duh hlôi pơgơ̆r Pơma đam khua hŏk iŏk yua kơjă hơnăn kơ pơlei tơm Festival Pơkao Đà Lạt păng trong erih xa kơ bơngai Đà Lạt “dim rơnim, rơhal rơhŏ, hrŭk xa bot, ‘mêm kơ tơmoi”. Pơma đam hlôi ‘măn lơ jơ tơroi ƀai chih păng nơ̆r tơgop tăp dăr dôm tơdrong kăp gĭt hơnăn pơlei Festival pơkao Đà Lạt. Ƀok Tôn Thiện San, Kơdră Anih vei lăng kon pơlei pơlei tơm Đà Lạt xơkơ̆t, kiơ̆ đơ̆ng tơdrong akŏm Festival Pơkao Đà Lạt, tơdrong pơtăm pơkao hlôi đei pôk bơnê păng xơkơ̆t hơnăn pơkao Đà Lạt jing tơdrong pran kăl đei axong jang hơtŏk pơm jang pơkao:  “Hăm dôm trong pơm jang kiơ̆ khua hŏk lơ tơdrong jang, dôm hla bar chih, pơkăp khua hŏk đei pơma đam, tơblang, pơm hơdăh xơnong, tơdrong kăp gĭt kơ hơnăn pơlei tơm Festival Pơkao Đà Lạt păng trong erih xa kơ bơngai Đà Lạt … Nhôn lui ngeh, lơ̆m khei năr truh pơlei tơm Đà Lạt gô pơtoi iŏk jang jơnei mŭk drăm, tơdrong pran kơ tơring vă hơtŏk tenh, tôm tong păng kơjăp xơđơ̆ng, tơgrop tih tên lơ̆m tơdrong hơtŏk tơ-iung atŭm kơ tơring Tây Nguyên păng jâ̆p teh đak”

Festival pơkao Đà Lạt ‘măng mă 9 xơnăm 2022 pơdui đunh truh năr 31/12, pơkăp hăm lơ tơdrong kăl, tơdrong hơmroh kăp gĭt ăn tơmoi păng kon pơlei tơ̆ tơring chă tơmang lăng. Lơ̆m noh, dôm anih ‘măn pơkao hơdrih đei pơkăp tăp dăr anih tơm gô pơtoi pơrŏ ‘măn truh đĭ têt nguyên đán hloi.