Mŭk drăm Joh ayŏ Apŭng plenh teh Hội An, dêh char Quảng Nam lơ̆m dôm 'năr jê̆ đĭ xơnăm 2022, kiơ̆ dôm jăl trong kơphô̆ xo xơ̆ đei lơ tơmoi đơ̆ng teh đak đe truh. Nha hang, khăch sạn păng dôm anih akŏm pơchơt roi kơdrâ̆m bơngai hloh. Tơnap vă băt hơdăh, minh xơnăm adrol ki, kơphô̆ xo Hội An rơngot rơnguơ̆ ưh gan đei bơngai. Pơlei tơm đei truh 2/3 kơsô̆ măt kon pơlei pơm jang găh tơdrong tơmang pơhiơ̆ hlôi găn ga hloh 2 xơnăm hliĕng anat, tơdrong erih kon pơlei tơxŭl tơxăl kơyuơ đơ̆ng pơrang jĭ Covid-19. Dang ei, Hội An hlôi hơmet pơ-'lơ̆ng um ai kơ minh pơlei tơm tơmang pơhiơ̆, nhen tam mă lah đei “pơrang pơrê̆ch hli hlơt” yơ hơbuh găn tơring âu.

Pơmai Nguyễn Thanh Tâm, tơ 'ngla Hnam tih An, pơlei tơm Hội An hăt hot hơmet ăn tơdrong xơng tơmoi truh tơmang ăh Têt Dương lĭch păng Têt Nguyên Đan Quý Mão. Kiơ̆ pơmai Nguyễn Thanh Tâm, lơ̆m khei năr tơnap tap lơ̆m 2 xơnăm kơ âu hlôi tơgŭm bơngai jang tơmang pơhiơ̆ tơ̆ Hội An athei jang pơtrŏ păng kơdih pơm 'nao kơdih po vă pơtoi hơtŏk tơmang pơhiơ̆ kiơ̆ pơkăp kơjăp xơđơ̆ng, kiơ̆ rok trong jang tơmang pơhiơ̆ jơk. Mă Tơchơ̆t Tơmang pơhiơ̆ jơk 'nao đei dêh char Quảng Nam tơbang ăh khei 3 xơnăm 2022 mă lei tơpă đei lơ anih jang găh tơmang pơhiơ̆ tơ̆ Hội An hlôi pơm kiơ̆ tơchơ̆t âu đơ̆ng đunh bơih. Hơdăh nhen ưh đei tuh rơm rĕk kư̆ kă, ưh gan yua kơdŭng nilŏng, kơhôp như̆a, jang tơmang pơhiơ̆ tơguăt rơgoh hăm cham char erih xa. Pơmai Nguyễn Thanh Tâm ăn tơbăt, mă blŭng bơngai jang păng tơmoi truh tơmang adoi ưh kơ juăt, lơ bơngai ưh kơ drơ̆ng hăm trong jang âu mă lei gơnơm pơsơ̆n pơm kiơ̆ noh dang ei jing juăt bơih: “Đon kơchĕng 'nao dang ei đơ̆ng tơmoi teh đak đe păng boăl mơlôh Việt Nam adoi băt hơdăh găh vei lăng cham char. Ăh mă đe băt hơdăh kơdih po kiơ̆ jang pơkăp âu noh đe tơgŭm dăp đon dăp bơnôh".

Hloh 2 xơnăm kơ âu, pơrang jĭ Covid-19 hlôi pơm ăn 42 rơbâu bơngai jang găh tơmang pơhiơ̆ tơ̆ pơlei tơm Đà Nẵng hiong tơdrong jang. Kơsô̆ âu tơ̆ 2 dêh char Thừa Thiên Huế, Quảng Nam hơnơ̆ng tơplih đơ̆ng 14 rơbâu truh 18 rơbâu 'nu bơngai jang. Mă lei, đơ̆ng rŏng kơ pơih 'măng vih jang tơmang pơhiơ̆, xơnăm 2022, dêh char Quảng Nam hlôi xơng 4,8 trĭu 'nu tơmoi truh tơmang păng tơdrong pơyua đơ̆ng tơmang pơhiơ̆ đei pơhlom 3.800 tih hlj, axong tơdrong jang xa ăn hloh 16.000 'nu bơngai jang. Ƀok Phan Hộ, Kơdră Jơnŭm Vei hơlen Mŭk drăm Joh ayŏ Mỹ Sơn ăn tơbăt, mă tơnap tap mă lei anih jang hlôi adrin vei jơ̆ng 125 'nu bơngai pơm jang. Ăh pơih 'măng dơ̆ng, noh Mỹ Sơn hlôi xơng hloh 105 rơbâu 'nu tơmoi truh tơmang, tŏk hloh 110% pơtêng hăm pơkăp jang kơ xơnăm 2022: “Lơ̆m khei năr ƀơm răm đơ̆ng pơrang jĭ, nhôn ưh đei iŏk yua yă kiơ hloi. Hăm minh anih jang tơ 'ngla pơgơ̆r găh jên hu noh tơnap tap dêh. Nhôn hơvơn đe kang ƀô̆, bơngai jang, atŭm hăm noh iŏk yua jên mong hơmŏ vă kla jên khei ăn bơngai jang. Khul kang ƀô̆, bơngai jang lui ngeh hăm anih jang păng đe xư atŭm kơ 'nôh vă găn hloh tơnap tap”

Việt Nam oei lơ̆m hơnăn dôm teh đak pơih 'măng hrôih hloh lơ̆m tơring păng đei Anih jang Tơmang pơhiơ̆ Apŭng plenh teh xơkơ̆t jing đei tơchơ̆t pơih 'măng rơhal rơhŏ pơxă hloh. Xơnăm 2022, rim dêh char, pơlei tơm lơ̆m tơring Tŏk bŏk pơgơ̆r dôm tơdrong akŏm kăp gĭt lơ̆m kơpal teh; tơlĕch lơ tơdrong pơm jang, tơroi tơbăt truh dôm tơring Châu Âu, Hàn Quốc, Singapore, Ấn Độ, păng Nhâ̆t, dar deh hơmet pơ-'lơ̆ng dôm trong păr apŭng plenh teh. Tơ̆ pơlei tơm Đà Nẵng, pơtoi đei dôm tơdrong vih vơ̆t hăm gre păr đơ̆ng teh đak đe truh Đà Nẵng đei iŏk jang. Kiơ̆ kơsô̆ chih akŏm đơ̆ng Anih tơm jang Tơmang pơhiơ̆ Việt Nam, xơnăm 2022, kơsô̆ tơmoi đơ̆ng teh đak đe truh Việt Nam jô̆ hơlen đei 3,5 trĭu 'nu. Minh lơ̆m dôm trong pơm jang kăp gĭt vă hơvơn tơmoi đơ̆ng teh đak đe truh noh pơtoi pơm 'nao anih truh, hơtŏk pran tơroh tơmang pơhiơ̆ hăm lơ dêh char, pơlei tơm lơ̆m jâ̆p teh đak. Ƀok Lê Trí Thanh, Kơdră Anih vei lăng kon pơlei dêh char Quảng Nam ăn tơbăt, tơroh hơtŏk jang tơmang pơhiơ̆ jing trong jang kăp gĭt, ưh adrô̆ tơgŭm ăn rim tơring chĕp vei đei tơdrong hiôk kơdih mă oei pơm jang đei dôm kơjă atŭm găh cham char, mŭk drăm joh ayŏ lơ̆m tơring, tơgop hơtŏk pran jang tơmang pơhiơ̆ hơtŏk tơ-iung kơjăp xơđơ̆ng: “Nhôn hlôi pơjing dôm pơkăp tơmam drăm gơnơm lơ̆m cham char, iŏk yua dôm kơjă gĭt mă cham char axong ăn Quảng Nam adoi nhen kơjă găh joh ayŏ, tơring teh, kon bơngai mă Quảng Nam đei lơ tơdrong pran. Atŭm hăm noh, duh gô tơguăt hăm rim tơring nai lơ̆m Tơring jang mŭk drăm dơnơm kơ tơring Tŏk bŏk tơguăt hăm pơjing dôm pơkăp tơmam drăm trŏ ƀlep vă tơbang tơmam drăm tơmang pơhiơ̆ jơk hăm bôl boăl apŭng plenh teh băt truh”

Tơ̆ Lêh Pôk hơpăh Tơmang pơhiơ̆ Apŭng plenh teh xơnăm 2022 – tơring châu Á păng châu Đại Dương, Tơmang pơhiơ̆ Việt Nam hlôi iŏk đei 16 tơmam hơpăh tơmang pơhiơ̆, pơtoi xơkơ̆t hơnăn, xơnong jang păng anih dơ̆ng kơ tơmang pơhiơ̆ Việt Nam lơ̆m tơring păng lơ̆m kơpal teh. Ƀok Đoàn Văn Việt, Thư̆ trưởng Anih tơm Joh ayŏ, Tơplŏng kơdâu păng Tơmang pơhiơ̆ xơkơ̆t, tơdrong pơgơ̆r keh kong xơnăm Tơmang pơhiơ̆ kơ Teh đak - Quảng Nam 2022 hlôi pơyua kăp gĭt lơ̆m  tơdrong hơvơn axong jang, hơtŏk tơmam drăm tơmang pơhiơ̆ păng kơ 'nôh pran tơdrong tơbang um ai, teh đak, kon bơngai Việt Nam, pơjing um rŭp ƀenh kơ pơnĭk 'lơ̆ng rŏ kơ tơdrong jang tơmang pơhiơ̆ Việt Nam ăh păđei pơma truh tơdrong jang tơmang pơhiơ̆ kơ xơnăm 2022 hơyak ăn xơnăm 2023 ƀenh kơ tơdrong xô̆ xôn, hơpơi 'lơ̆ng pơtoi đei dôm tơdrong jang jơnei keh kong.