VOV4.Bahnar - Kơsơ̆ brei, năr 19/9, Jơnŭm vei lăng kon pơlei dêh char Gia Lai pơgơ̆r ‘măng hop akŏm mă tơpơ̆h, iung jang pôk tơmơ̆t kơchư̆k Kơdră chĕp pơgơ̆r Dơnŏ anĭh vei lăng kon pơlei dêh char.

Bí thư Đảng dêh char Hồ Văn Niên (găh ‘ma) pôk ăn pơkao, hmach chơt hơ iă ăn kơ ƀok Long đei pôk tơmơ̆t jang kơchư̆k ‘nao

Tơ̆ au, ƀok Trương Hải Long- Kơ iĕng Kơdră chĕp pơgơ̆r Đảng dêh char Gia Lai đei 67 lơ̆m 68 ‘nu kơdră tang măt Jơnŭm vei lăng kon pơlei pôk tơmơ̆t ƀok jang Kơdră chĕp pơgơ̆r Dơnŏ anĭh vei lăng kon pơlei dêh char Gia Lai jăl jang 2021-2026. Ƀok Trương Hải Long, rơnĕh sơnăm 1976, pơlei tơring Yên Trung, apŭng Yên Phong, dêh char  Bắc Ninh, mơ̆t jang Đảng sơnăm 2004, lĕch ‘măng khoă Hnam trương Đăi hŏk Khoa học Xã hội và Nhân văn, Đại học Nơ̆r tĕh đak đe  (Đại học Quốc gia Hà Nội); hŏk đang thạc sĩ Luật păng lý luận chính trị cao cấp, cử nhân anh văn. Hơdrol đei pôk tơmơ̆t jang kơchư̆k Kơdră chĕp pơgơ̆r Dơnŏ anĭh vei lăng kon pơlei dêh char Gia Lai, ƀok Long hlôi đei jang rim kơchư̆k nhen: Kơ iĕng kơdră, Kơdră chĕp pơgơ̆r Vụ Công chức - Viên chức, Bộ Nội Vụ; Kơdră jang lơ̆m Khŭl kơdră chĕp pơgơ̆r Đảng, Kơ iĕng Kơdră Bộ Nội vụ, đei pơ prŏ ăn jang Kơchư̆k Kơdră chĕp pơgơ̆r Bộ Nội vụ jăl jang 2021-2026 păng đei Dơnŏ anĭh tơm Chĭnh trĭ pơjao vang jang lơ̆m Khŭl Kơdră chĕp pơgơ̆r Đảng dêh char Gia Lai, iŏk jang kơchư̆k Kơ iĕng Kơdră chĕp pơgơ̆r Đảng dêh char lơ̆m khei  9/2022.

Tơblơ̆ nơ̆r: Amazưt