6 khei blŭng sơnăm, mŭk drăm kơ dêh char Gia Lai tŏk hlŏh 8%. Tơdrong jang tŏk đei ƀôh tơ̆ 3 anih jang mŭk drăm, đei jang kơmăy – ming man, pơvih pơvăn, choh jang xa, pơtăm ‘long. Lơ̆m noh, kơmăy kơmŏk tŏk pran ‘lơ̆ng, sơng đei jên jang lơ hăm 165 tơdrong jang, akŏm đĭ đăng kơsô̆ jên đei kĭ pơkăp tơlĕch jang vă jê̆ 165 rơbâu ti, tŏk hlŏh 3 ‘măng pơting hăm khei âu sơnăm sơ̆. Thu mong jên ăn tehđak đei hlŏh 16 rơbâu ti, tŏk hlŏh 22%.

Vă jang đei đon pơhnŏng jang tŏk hlŏh 10%, Anih vei lăng kon pơlei dêh char Gia Lai chih hơdăh, jên tơmât jang đơ̆ng teh đak oei jing jơhngâm pran gĭt kăl lơ̆m dôm khei hơtuch sơnăm. Kơdră vei lăng kon pơlei dêh char Gia Lai, Phạm Anh Tuấn ăn tơbăt, tơlĕch hrĕnh jên jang đơ̆ng teh đak kŭm jing hơyak tŏk ‘nao, yoa lơ anih jang, tơdrong jang hlôi jang đang oei gô pơm hla ar kla jên đĕch.