Thoi noh, đơ̆ng năr 5/10 truh dang ei, khul juăt jang hlôi sir akŏm đei 24 kơ̆l kơting linh lôch tang ăn teh đak tơ̆ tơring ou. Hơdrol kơ noh, đơ̆ng kră pơlei, linh so  Siu Pich (72 sơnăm) chă tơroi, Khul K52 hlôi chă hơlen lăng tơ̆ tơring.

Kiơ̆ đơ̆ng pơtêng hăm um la kak khei năr tơblah vang sơ̆, khul juăt jang akŏm chơ chă sir kôch tơ̆ pơgar 'long điêu kơ unh hnam ƀok Siu Pich. Atŭm hăm kơ̆l kơting linh lôch tang, dôm tơmam drăm yua hơdoi kŭm đei chă ƀôh. Dang ei 24 kơ̆l kơting linh lôch tang hlôi đei iŏk kơcheh kơting vă 'măn ăn tơdrong pơkăp ADN, sơkơ̆t hơdah hơnăn măt pơlei pơla.