VOV4.Bahnar - Kơ sơ̆ 9/8, Khul jang đơ̆ng Anih vei lăng jŏh ayŏ kơ dŏ xoang, pơ tho pơ hrăm kơ Kuô̆k hô̆i yoa Phŏ Kơ dră Anih âu Tạ Văn Hạ chĕp kơ̆l đei jơ bơ̆ jang hăm Dơ nŏ anih vei lăng kon pơ lei dêh char Gia Lai găh “Tơ drong jang kiơ̆ trong tơ gŭm, khôi luơ̆t tang găn glơ̆k ăn hơ iŏh”. Kiơ̆ nơ̆r tơ roi lơ̆m hop akŏm, đơ̆ng 2016 truh dang ei, kơ sô̆ hơ iŏh lôch yoa pơ̆k rơ ka, glơ̆k tơ̆ Gia Lai đei 546 ‘nu, lơ̆m nŏh đei truh 401 ‘nu hơ iŏh lôch glơ̆k.

Phŏ Kơ dră Anih vei lăng jŏh ayŏ kơ dŏ xoang, pơ tho pơ hrăm đơ̆ng Kuô̆k hô̆i Tạ Văn Hạ pơ ma lơ̆m jơ bơ̆ jang

Lơ tơ drong glơ̆k tơ̆ đak ‘nŏh yoa hơ iŏh ưh gơ̆h glơi, ưh băt trong veh ver tơ drong glơ̆k. Vă găn ƀiơ̆ tơ drong glơ̆k tơ̆ đak, đơ̆ng sơ năm 2016 truh dang ei, dêh char Gia Lai hlôi tơ lĕch trong jang “Bơ bŭng hnam sơ đơ̆ng ‘lơ̆ng tang găn pơ̆k rơ ka, glơ̆k tơ̆ đak ăn hơ iŏh”, pơ tâp pơ hrăm, roi tơ ƀôh, krao hơ vơn 14.500 unh hnam tơ̆ 20 xăh, thĭ trơ̆n. Đơ̆ng sơ năm 2018, Dơ nŏ anih vei lăng kon pơ lei dêh char Gia Lai hlôi tơ lĕch 13,5 ti hlak jên vă man sơ lŭng đak hum glơi tơ̆ dôm hnam trưng lơ̆m dêh char. Hrei ‘nâu, lơ̆m dêh char đei 90 sơ lŭng glơi đơ̆ng tĕh đak păng kon pơ lei man.

Dơ̆ng: Tơ blơ̆