Kiơ̆ tơbăt, pơyan phang ou ki, Khul K52 dêh char Gia Lai hlôi kôch akŏm đei 18 kơl ƀô̆ đô̆i lôch dŏng teh đak tơ̆ Campuchia păng 27 kơl ƀô̆ đô̆i lôch dŏng teh đak lơ̆m dêh char. Iung jang kiơ̆ “ ‘Măng iung jang 500 măng năr”, Gia Lai hlôi chih tơmơ̆t lơ̆m yưh lĭu vă jê̆ 42.000 lŏk păng iŏk 2.705 kơcheh kơting ADN. Pơma pơtôch hop akŏm, yă Nguyễn Thị Thanh Lịch, Kơ iĕng Kơdră chĕp pơgơ̆r Hơnih vei lăng kon pơlei dêh char, pơkă tơdrong năm tơchă păng hơlen băt hơnăn ƀô̆ đô̆i lôch dŏng teh đak ‘noh mĭnh tơdrong jang chinh trĭ tôch gĭt kăl, kăl iung jang kơtang hloh. Yă athei rim hơnih jang, tơring tĕnh koăng dăr lăng kơlen kơtơ̆ng ang, mă kăl ‘noh rim sơlŭng ƀŭ tơpôl tơ̆ rim tơring tơm nhen Đak Pơ, Đồi Xuân Sơn, Chư Prông, adoi tơroi tơbăt tơdrong iung jang lơ̆m giĕng ăn hơnih bơ̆ jang chĕp pơgơ̆r. Lơ̆m bơ̆ jang iŏk kơcheh kơting khăm hơlen ADN, athei rim khul iung jang hơnơ̆ng ưh kơ jô̆ năr pơdơ̆h; adoi pơjao ăn Hơnih tơm Ƀô̆ đô̆ dêh char tơlĕch trong jang chơ ba kơcheh kơting tĕnh koăng hloh, sơđơ̆ng hloh.