Pơma pơtơm Hop akŏm Trung ương 3 jăl 14, Tổng Bí thư, Kơdră teh đak bơ̆n Tô Lâm ră hơdah tơdrong kăl tơplih đơ̆ng pơkăp jơnŭm pơgơ̆r jang jing hơtŏk tơdrong pơgơ̆r pơm jang gơh 'lơ̆ng hloh kơ Đảng păng hơnih jang chĭnh trĭ.

Kiơ̆ kơ Tổng Bí thư, Kơdră teh đak bơ̆n – bot 'lơ̆ng jơnŭm pơgơ̆r jing tơchơ̆t mă hơtuch luch noh Đảng pơgơ̆r jang đei jơnei hloh, Jơnŭm pơgơ̆r teh đak vei lăng 'lơ̆ng hloh, jơnŭm pơgơ̆r jang tenh hloh păng kon pơlei đei pơvih pơvăn 'lơ̆ng hloh. Tơdrong mă ou hlôi đei lơ kon pơlei păng rim bơngai juăt jang, bơngai jang khua hŏk drơ̆ng lăp. ƀok Nguyễn Tiến Dĩnh Sơ̆ jang Thư̆ trưởng Hơnih tơm Nô̆i vŭ sơkơ̆t hơdah, nhen Tổng Bí thư, Kơdră teh đak bơ̆n Tô Lâm ră hơdah, tơdrong pơkăp jơnŭm pơgơ̆r lơ̆m khei năr ou ki jĭ minh tơdrong jang kăch mạng vă pơm bot hơnih jang chĭnh trĭ, hơmet tơdrong hơlơ̆k hơle, tơjru tơdrong pơm kơdranh ưh kơ tơnăp. Mă lei, pơm bot jơnŭm pơgơ̆r jĭ tơchơ̆t jang mă hơtuch luch vă pơjing minh jơnŭm pơgơ̆r pran kơtang, pơm jang đei jơnei 'lơ̆ng lơ̆m tơdrong jang vei pơgơ̆r teh đak păng pơvih ăn kon pơlei roi năr roi tơnăp hloh. Kiơ̆ đơ̆ng noh vă pơtrŏ hăm tơdrong hiôk đơ̆ng kon pơlei, iŏk kon pơlei pơm tơm lơ̆m rim tơdrong jang, adoi nhen tơchơ̆t jang đơ̆ng Đảng, đơ̆ng Jơnŭm pơgơ̆r teh đak.

Kiơ̆ kơ ƀok Nguyễn Tiến Dĩnh, pơkăp jơnŭm pơgơ̆r tơguăt hăm pơkăp jơnŭm pơgơ̆r tơring 2 jăl đơ̆ng rŏng khei năr pơm jang hlôi pơjing đei lơ tơdrong tơplih 'lơ̆ng, jơnŭm pơgơ̆r jang bot 'lơ̆ng hloh pơtêng hăm hơdrol ki. Lơ̆m khei năr blŭng mă oei đei lơ tơnap tap, tơhlăk tơhlĭn, mă lei truh dang ei đơ̆ng rŏng minh sơnăm pơm jang, jơnŭm pơgơ̆r lơ̆m hơnih jang chĭnh trĭ tơ̆ dôm jăl jang hlôi sơđơ̆ng, pơm jang 'lơ̆ng hloh, pơm jang trŏ tơchơ̆t tơguăt tơjê̆ hăm kon pơlei hloh. Tơdrong jang vei lăng đơ̆ng teh đak, sek asong tơdrong jang ăn kon pơlei păng hơnih jang mŭk drăm roi năr roi tenh kuăng, 'lơ̆ng hloh; vei sơđơ̆ng chĭnh trĭ, sơđơ̆ng tơpôl tơ̆ tơring hơrih xa, mŭk drăm – tơpôl pơtoi hơtŏk tơ-iung. Kiơ̆ đơ̆ng hơlen tơchơ̆t ƀôh mŭk drăm tơpôl kơ jơ̆p teh đak adoi tŏk kơjung hloh pơtêng hăm khei năr ou sơnăm hơdrol ki. 'Nou jĭ dôm tơdrong jang đei jơnei mă blŭng, sơkơ̆t hơdah tơchơ̆t pơkăp bot 'lơ̆ng jơnŭm pơgơ̆r jing trong jang trŏ ƀlep.

Vă pơtoi hơtŏk tơdrong pơgơ̆r vei lăng păng pơvih 'lơ̆ng ăn kon pơlei, ƀok Nguyễn Tiến Dĩnh akhan, kăl akŏm keh đang tơchơ̆t pơjing jơnŭm pơgơ̆r, atŭm hăm noh hơtŏk hơgei ăn khul kang ƀô̆, bơngai jang, mă kăl noh kang ƀô̆ kơpal vei lăng, kang ƀô̆ kơpal pơgơ̆r tơdrong jang tơm. Atŭm hăm tơdrong juăt jang, kang ƀô̆ athei đei đon 'lơ̆ng lơ̆m pơm jang, athei tơnăp hăm sơnong jang păng jang pơvih ăn kon pơlei 'lơ̆ng hloh. Ƀok Nguyễn Tiến Dĩnh pơtruh nơ̆r: “Vă jơnŭm pơgơ̆r tơring 2 jăl gơh pơm jang 'lơ̆ng hloh, lơ̆m khei năr truh, bơ̆n athei pơtoi hơlen lăng păng tơchơ̆t jăl pơgơ̆r, mă kăl tơchơ̆t jăl pơgơ̆r trŏ ƀlep păng pran kơtang hloh, hơdah hloh. Hơlen lăng dơ̆ng vă pơkăp mă trŏ jơnŭm pơgơ̆r jang, mă kăl noh hăm jơnŭm pơgơ̆r juăt jang, pơtrŏ hăm tơdrong tơlĕch jang păng jang hơgei 'lơ̆ng hăm khul kang ƀô̆ bơngai jang lơ̆m jơnŭm pơgơ̆r jang hrei ou".