Tơ̆ tơdrong jang man Hnam trưng teh đak rong jăl mônh păng jăl ƀar Sa Loong, xăh Sa Loong, kơhrĕng ‘nu công nhân đei klăih song pơm lơ khul, hrơ̆ch pơgơ̆r ming man lơ anih. Tơ̆ dôm hnam hŏk, công nhân oei hơmet pơkĕh bơbŭng; tơ̆ hơla, dôm khul oei sơng hơmet dôm tơnăr tam mă sơng. Oei tơ̆ lăm lăm hŏk, ‘măng, unh điên, hang lơng, kung păng dôm tơmam kăl tŏk bŏk chô̆, tăh hơmet.

Anih iŏk ming man tơdrong jang ‘nâu oei man 5 tŏ hnam hŏk, 1 anih ăn thây kô vei lăng, 1 anih pơm hơmet ming kŭm hăm lơ anih kăl nai. Kiơ̆ trong jang, 5 tŏ hnam hŏk gô đei pơjao adrol kơ ‘năr 30/7; anih ăn thây kô vei lăng man đang adrol kơ ‘năr 10/8; hnam pơtâp pơhrăm păng dôm anih kăl nai gô man đang đơ̆ng ‘năr 15 truh 20/8.

‘Mi đunh năr pơm ưh ‘lơ̆ng truh tơdrong ming man. Vă hơmet pơ ‘lơ̆ng, anih iŏk jang chô̆ ƀao kak, pĕng ‘mi tơ̆ lơ anih ming man, atŭm hăm ‘nŏh pơtruh dơ̆ng lơ bơngai jang năm tơgŭm. Dang ei tơ̆ anih ming man oei hơnơ̆ng đei dang 220 ‘nu bơngai jang, bơ̆ jang dang 11 jơ 1 năr. Ƀok Nguyễn Văn Nhất, Phŏ Kơdră Anih jang 29.7, găh Công ty tơm 319, Anih tơm vei lăng khul linh teh đak, pơma hơdăh, anih jang năng ‘nâu jĭ tơdrong jang chinh trĭ gĭt kăl kơna hlôi akŏm tôch ai bơngai jang, tơmam drăm vă gơ̆h ming man trŏ năr hơgăt: "10 năr âu ki, ‘mi hơnơ̆ng. Anih jang pơtơm tơlĕch trong hơmet ming, nhen chô̆ ƀao kak pĕng ‘mi ƀât dôm anih oei tô tơ̆ ‘ngoăih. Hăm anih oei lơ̆k hơnă, anih jang pơm 2 tŏ hnam chô̆ ƀao kak pĕng ‘mi, 1 hnam xă dang 60 met, vă gơ̆h ming man hloi lơ̆m năr ‘mi. Tơchĕng adrol truh ‘năr 15/8 gô man đang hnam hŏk păng anih ăn hŏk tro oei".

Tơ̆ tơdrong jang man Hnam trưng teh đak rong jăl mônh păng jăl ƀar Dục Nông, anih man kŭm akŏm đơ̆ng 250 truh 270 ‘nu công nhân man hơnơ̆ng 3 ka 1 năr. Kiơ̆ trong jang, adrol kơ ‘năr 31/7 gô pơjao 7 anih man, đei 3 hnam hŏk jăl ƀar, 3 hnam hŏk jăl mônh păng hnam thây kô vei lăng; dôm anih kăl nai nhen hnam sŏng xa, hnam oei gô man đang adrol kơ ‘năr 15/8.

Thượng tá Vũ Thanh Khương, Bí thư Đảng, Kơdră Khul vei lăng Công ty jang hơdoi 319 Tơring Tŏk bŏk (găh công ty tơm 319, Anih tơm vei lăng khul linh teh đak) ăn tơbăt, găh tơdrong man hmă vă đang bơih. Dang ei oei pơgơ̆r sơng hơmet, chô̆ unh điên, kơmăy kơmŏk, pơm hang lơng, man hơnă kung păng bơ̆ jang lơ tơdrong jang ki thuơ̆t nai. Thượng tá Vũ Thanh Khương pơkăp gô man đang trŏ năr hơgăt păng man kơjăp ‘lơ̆ng: "Adrin pơjao hnam hŏk ăn tơ ‘ngla tơmât jên jang tơmât yoa adrol kơ sơnăm hŏk ‘nao. Hrei ‘nâu, lơ̆ anih jang, anih ming man hơnơ̆ng akŏm đơ̆ng 250 truh 270 ‘nu công nhân jang 3 ka hơnơ̆ng. Hơdrô̆ ka jang tơ̆ kơmăng, 1 kơmăng đei đơ̆ng 50 truh 80 ‘nu công nhân bơ̆ jang vă adrin jang kĕh đang trŏ khei ‘năr hơgăt".

Kiơ̆ Anih vei lăng tơdrong tơmât jên jang găh Pơmât Quảng Ngãi, 4 hnam trưng tơ̆ tơring sơlam đei Rờ Kơi, Sa Loong, Dục Nông păng Mô Rai oei pơgơ̆r bơ̆ jang, hơlen năng tôch ‘lơ̆ng lơ̆m rim năr. Anih vei lăng ăn kăn ƀô̆ jang ki thuơ̆t hơnơ̆ng jur dăr lăng tơ̆ anih man vă tơtom hơmet pơ ‘lơ̆ng dôm tơdrong pơmat tat, mă loi ‘nŏh găh tŏ ‘mi kial kơnê̆.

Truh dang ei, Hnam trưng Rờ Kơi jang đei dang 90% tơdrong jang, Dục Nông jang đei 87%, Sa Loong jang đei 82%, oei Mô Rai jang đei dang 68%, đĭ đăng oei vă mât lơ̆m khei ‘năr hơmet mă ‘lơ̆ng.

Ƀok Võ Đại Tân, Kơdră Anih vei lăng tơmât jên jang găh Pơmât Quảng Ngãi ăn tơbăt, đon pơhnŏng ‘nŏh khŏm hơnhăk 4 hnam trưng âu tơmât yoa adrol kơ lêh mât hŏk sơnăm hŏk ‘nao 2026 – 2027, vang tơgop bơ̆ jang đei tơdrong Tơchơ̆t kơsô̆ 71 đơ̆ng Anih tơm Chinh trĭ găh atŏk tơiung pơtho pơhrăm, dar deh pơm tơjur ƀiơ̆ tơdrong ưh hơtŏ băl găh hŏk pơhrăm tơ̆ tơring pơmat tat dêh hlŏh hăm dôm tơring nai.

"’Nâu jĭ tơdrong jang ưh lăp adrin jang mă đang đĕch mă ‘nâu jĭ nơ̆r athei jang khŏm keh vă pơm ‘lơ̆ng ăn tơdrong pơtho hŏk pơhrăm ăn đe kon mon. Yoa thoi noh, tơdrong kơhret athei jăh jang kĕh tih dêh, mă loi ƀât mă đei tŏ ‘mi kial ưh kơ ‘lơ̆ng. Anih vei lăng kŭm vă hơdrin truh ‘năr 31/7 gô jang đang dôm anih ming man, tăh bơbŭng. Đơ̆ng rŏng kơ ‘nŏh hơtŏk hrĕnh tơdrong jang tơ̆ 1,2 hnam hŏk vă gơ̆h man đang adrol kơ ‘năr 15/8. Đĭ đăng dôm hnam trưng athei hơmet mă tôm, pơm ‘lơ̆ng vă tơmât yoa lơ̆m sơnăm hŏk ‘nao kiơ̆ nơ̆r pơtho đơ̆ng Trung ương".