Pơ gê 4/11, Anih jang đảng dêh char Gia Lai pơ gơ̆r hop akŏm pơ tôch 5 sơ năm bơ̆ jang tơ drong jang atŏk tơ iung chă tơ mang lăng tơ̆ tơ ring. Hop akŏm hlôi tơ lĕch đon pơ hnŏng truh sơ năm 2025, Gia Lai sơng đei 2,1 triu ‘nu tơ moi, akŏm đĭ đăng iŏk yoa đơ̆ng chă tơ mang lăng đei 1.400 ti hlak jên. 

5 sơ năm âu ki, tơ drong hơ tŏk chă tơ mang lăng tơ̆ Gia Lai đei ƀôh tŏk ‘lơ̆ng, iŏk yoa păng tơ moi truh tơ mang lăng tŏk sơ đơ̆ng rim sơ năm. Đơ̆ng 2017 – 2021, akŏm đĭ đăng jên tơ mât ăn tơ drong man anih jang, pơm trong pơ yoa ăn chă tơ mang lăng hlŏh 245 ti, akŏm ăn dôm anih chă tơ mang lăng gĭt kăl gơ̆h tơ lĕch jang hrĕnh.

Đơ̆ng 2022 – 2025, Gia Lai tơ lĕch trong atŏk tơ iung chă tơ mang lăng kơ jăp ‘lơ̆ng kiơ̆ đơ̆ng pơm hơ tŏk dôm tơ mam tơm, ‘lơ̆ng vă pơ yoa ăn tơ drong chă tơ mang lăng nhen Gia Lai nhen: Tơ drong jang pơm Anih chă tơ mang lăng Biển Hồ - Chư Đang Ya, Anih chă tơ mang lăng chơ kơi Phú Cường, anih chă tơ mang lăng pơ gar ‘long tĕh đak Kon Ka Kinh tơ ring vei lăng tơ mam bri brăh Kon Chư Răng, dơ nâu đak Ayun Hạ, dơ nâu Hnam kơ măy unh điên Sê San 4 – Thác Mơ. Pơ jing lơ trong chă tơ mang lăng lơ̆m tơ pôl, chă tơ mang lăng tơ̆ tơ ring tơ rang.