VOV4.Bahnar - ‘Năr 17/5, Anih mong jên tơ jră jĭ rơ ka lôch Châu Á (AIP) jang hơ dai hăm Anih vei lăng sơ đơ̆ng trong nơ năm dêh char Gia Lai pơ gơ̆r hơ len lăng pơ tôch jăl jang 2 đơ̆ng Tơ drong jang “ hao gre dơ dar - Hnam trưng hŏk sơ đơ̆ng” tơ̆ pơ lei tơm Pleiku. Tơ drong jang đei tơ lĕch jang tơ̆ pơ lei tơm Pleiku (Gia Lai) đơ̆ng khei 7/2020 truh dang ei. Kiơ̆ hơ len lăng đơ̆ng ƀok Lê Văn Hạnh- Phŏ kơ dră vei lăng Anih vei lăng trong nơ năm gre kơ dâu, Phŏ Kơ dră chĕp kơ̆l Anih vei lăng sơ đơ̆ng trong nơ năm dêh char Gia Lai, dôm hnam trưng hŏk tơ̆ pơ lei tơm Pleiku hlôi vei sơ đơ̆ng dôm tơ drong hơ găt găh tơ drong jang hơ nih hnam trưng hŏk sơ đơ̆ng ‘lơ̆ng.

‘Măng jang Hnam trưng hŏk Chu Văn An (pơ lei tơm Pleiku)

Kiơ̆ kơ ‘noh, tơ̆ hơ nih ‘măng jang 29 hnam trưng hŏk jăl 1 tơ̆ pơ lei tơm Pleiku, anih jang tơ lĕch jang tơ drong jang hlôi hơ met ming, pơ̆ih să, man ‘nao hloh 800.000 mét vuông trong ƀê tŏng nhươ̆, ƀê tŏng xi măng; man hloh 2000 mét vuông jih trong; ming 136 kơ ƀang chih tơ roi trong nơ năm tơ̆ hơ nih ‘măng jang hnam trưng; tơ mơ̆t dơ̆ng chhơ̆ rek trong, hao gre dơ dar....Hơ dai hăm ‘noh jĭ dôm tơ drong jang hơ tŏk ‘lơ̆ng đon hlôh vao lơ̆m tơ pôl păng jang hơ dai hăm khŭl linh kanh sat vei lăng trong nơ năm pơ lei tơm Pleiku dăr joang, vei lăng, sek phak dôm bơ ngai pơm glăi tơ drong hơ găt ‘nao găh hao gre hrĕnh tơ̆ hơ nih hnam trưng hŏk.