VOV4.Bahnar -  Đơ̆ng rŏng 2 giĕng ăn hŏk tro đĭ đăng jăl hŏk năm hŏk kơ tă tơ̆ hnam trưng, anih pơ tho pơ hrăm dêh char Gia Lai chih jô̆ đei hlŏh 1000 ‘nu hŏk tro păng thây kô tơ pŏh jĭ COVID-19. Kơ plăh dang ei, dôm anih pơ tho pơ hrăm lơ̆m dêh char oei hơ nơ̆ng jang ‘lơ̆ng dôm trong jang tang găn jĭ hai, tơ plih ming trong pơ tho hŏk pơ hrăm hai.  

Thây kô păng hŏk tro tơ̆ plt Pleiku pơ tŏ hơ yuh hơ kâu adrol kơ mât hŏk

Dang ei dôm anih pơ tho pơ hrăm tơ̆ dêh char hơ nơ̆ng tơ lĕch nơ̆r tơ tă đơ̆ng Anih jang pơ gang păng pơ tho ăn Anih vei lăng pơ tho pơ hrăm trong tang găn jĭ tơ̆ hnam trưng. Dôm bơ ngai F0 ‘nŏh ăn oei hơ drô̆ păng ăn dôm lăm hŏk đei bơ ngai jĭ F0 hŏk trư̆k tuyê̆n lơ̆m dang 1 giĕng. Tơ̆ hơ năp kơnh, kiơ̆ nơ̆r pơ tho đơ̆ng Anih vei lăng pơ tho pơ hrăm dêh char, dôm anih pơ tho pơ hrăm hơ nơ̆ng roi tơ băt ăn mĕ ƀă hŏk tro, hŏk tro vă jang hơ doi pơm ‘lơ̆ng ăn tơ drong tang găn jĭ hai, vei kơ jăp tơ drong pơ tho hŏk pơ hrăm hai.

Dơ̆ng: Tơ blơ̆