Khŭl chĕp kơ̆l pơgơ̆r Anih jang Đảng dêh char Gia Lai hlôi drơ̆ng nơ̆r tơlĕch jang lơ tơdrong jang tơgŭm hơdrô̆ kiơ̆ tơdrong Tơchơ̆t kơsô̆ 72 đơ̆ng Anih tơm Chĭnh trĭ vă hơtŏk loi dơ̆ng vei lăng păng hơtŏk ‘lơ̆ng jơhngơ̆m pran kon pơlei. Lơ̆m noh kăl kơ lăng truh ‘noh jĭ trong tơlĕch jang tơmơ̆t jên jang vă jê̆ 300 ti hlak jên ăn jang pơgang tơring tơ̆ tơring sơlam, tơring pơmat tat dêh hloh kơ dêh char Gia Lai. Dêh char Gia Lai tơchĕng hơdrol tơgŭm hơdrol tơmơ̆t jên jang ming man, pơm hơtŏk păng răt bơ̆n tơmam kơmăy kơmŏk ăn kơ 24 hnam pơgang xăh găh tơring sơlam, tơring pơmat tat. Dôm tơdrong jang ‘noh đei pơih să grŭp hơnih bơ̆jang, man ‘nao hơnih hơlen lăng um rup, hơlen lăng bơ̆n pham, siêu âm, kơ̆p kư̆u blŭng a, hơnih hơmet pơ ‘lơ̆ng đak ‘mê̆ ‘mach đơ̆ng pơgang păng dôm tơdrong jang tơgŭm.

Akŏm jên tơchĕng hơdrol ăn tơdrong jang ‘nâu dang 288 ti hlak jên, lơ̆m noh 216 ti hlak jên ăn pơm hơmet, pơih să anih jang kăl păng dang 72 ti hlak jên vă răt bơ̆n tơmam pơgang nhen kơmăy siêu âm, tơmam hơlen lăng bơ̆n pham, tơmam kơ̆p kư̆u păng vei lăng pơrang jĭ. Hơdai hăm tơmơ̆t jên jang găh anih jang, tơmam drăm, dêh char Gia Lai kŭm tơlĕch jang tơdrong jang khăm jơhngơ̆m pran hơnơ̆ng ưh kơ hoach jên ăn kon pơlei tơ̆ 12 xăh sơlam, achon đak dơsĭ păng tơring pơmat tat dêh hloh.