VOV4.Bahnar - Pơ gê ‘năr 9/2, Anih vei sơ đơ̆ng trong nơ năm dêh char Gia Lai păng khŭl jang kơ pal tŏk bŏk hăt hot hơ met pơ ‘lơ̆ng hiong răm sar bar pơm ăn 6 ‘nu lôch păng 3 ‘nu rơ ka. Leng gong năr âu mơ̆n, gre tih kơ ƀang kơ sô̆ 81C-111.25 chơ ƀum ƀlang yua đơ̆ng Huỳnh Đức Nguyên (rơ neh sơ năm 1983, huơ̆r gre, oei tơ̆ phường Chi Lăng, pơ lei tơm Pleiku, dêh char Gia Lai) huơ̆r gre đơ̆ng xăh Hà Đông năm tơ̆ xăh Đắk Sơ Mei (apŭng Đắk Đoa). ƀơ̆t kơ dâu, gre tih ưh kơ ê jrok tơ̆ bơ nang jrŭ dang 70 mét. ‘Măng sar bar pơm ăn 6 ‘nu lôch. Đơ̆ng rŏng kơ iŏk đei tơ roi tơ băt, rim khŭl jang kơ pal dêh char Gia Lai tơ tĕnh năm tơ̆ hơ nih gre sar bar, pơ gơ̆r dŏng sar bar, dŏng tơ gŭm, chơ bơ ngai jĭ rơ ka năm kâp kư̆u păng hơ met pơ ‘lơ̆ng hơ nih sar bar, dăr hơ len pơm hơ dăh yua đơ̆ng kiơ pơm ăn sar bar.

Thuem: Tơ blơ̆