Truh dang ei, Gia Lai hlôi tơlĕch jang đang 91 lơ̆m 110 tơdrong vă jang ŭnh hơyuh hăm akŏp pơjing đei vă jê̆ 5.000 MW, hơtŏ hăm vă jê̆ 90% đei pơjao pơm tơlĕch. Tơ̆ jơ bơ̆ jang, Hơnih vei lăng kon pơlei dêh char Gia Lai athei Hơnih tơm vei lăng Mơdro sa lăng hơlen atŏk hloh dơ̆ng pơm tơlĕch đei ŭnh hơyuh đơ̆ng kial păng ŭnh hơyuh jơ̆ng ‘năr trŏ lăp hăm tơdrong kĕ jang đơ̆ng dêh char; hrôih pơjing đei kơjă ŭnh hơyuh lơ̆m sơnăm 2026; atok kơtang tơmơ̆t jên jang rim hơnih ming man ŭnh hơyuh; hơmet pơ ‘lơ̆ng tơhlăk tơhlĭn vă ƀar tơdrong vă jang ŭnh hơyuh kial ChơLong hăm Yang Trung hrôih đei iung jang tĕch tơlĕch, adoi đei trong pơm dă ƀiơ̆ tơjur tơlĕch ŭnh hơyuh kơ rim hnam kmăi pơm tơlĕch ŭnh hơyuh. Iung pơma tơ̆ jơ bơ̆ jang, Kơdră chĕp pơgơ̆r Hơnih tơm vei lăng Mơdro sa hôn bơnê tơlĕch jang kiơ̆ Trong proh hơmet ŭnh hơyuh VIII kơ Gia Lai. Adoi athei tơring hơnơ̆ng dăr lăng rim tơdrong vă jang, atŏk kơtang jang keh đang pơm hla bơar tơmơ̆t jên jang, hơmet pơ ‘lơ̆ng hơgăt teh ming man, iung jang hơdoi kơjăp hăm rim hơnih bơ̆ jang găh Hơnih tơm păng Hơnih jang ŭnh hơyuh vă hơmet tơtom rim tơdrong tơnap tap, sơđơ̆ng iung jang rim tơdrong vă jang ŭnh hơyuh kiơ̆ trong pơprŏ jang, tơgop lơ̆m pơm sơđơ̆ng ŭnh hơyuh teh đak.