VOV4.Bahnar - Lăp oei pă dang 1 khei dơ̆ng ‘noh truh ‘măng pơ long lĕch ‘măng khoă hŏk jăl 3  kơ teh đak sơ năm 2022. Anih vei lăng găh pơ tho pơ hrăm dêh char Gia Lai tŏk bŏk hơ drin hơ tŏk loi dơ̆ng hơ len lăng, dăr lăng, vei sơ đơ̆ng ‘măng pơ long lĕch ‘măng khoă hŏk jăl 3 kơ teh đak 2022 pơ gơ̆r sơ đơ̆ng, tơ păt. Vang akŏm ‘măng pơ long lĕch ‘măng khoă hŏk jăl 3 teh đak sơ năm ‘nâu, lơ̆m dêh char Gia Lai đei hloh 14.100 ‘nu hŏk tro vang chih măt pơ long; lơ̆m noh đei vă jê̆ 13.000 ‘nu hŏk tro hŏk phô thŏng, 384 ‘nu hŏk tro hŏk hơ nơ̆ng, uơ oei dơ̆ng ‘noh hŏk pơ long kơ dih.

Ôn ƀai ăn kơ hŏk tro vă hơ met ăn ‘măng pơ long lĕch ‘măng khoă hŏk jăl 3 teh đak vă jê̆ truh

Lơ̆m akŏp kơ sô̆ hŏk tro pơm hla ar vang pơ long đei hloh 13.000 ‘nu hŏk tro pơm hla ar set hŏk đăi hŏk, kao đăng. Kiơ̆ lơ̆m kơ sô̆ hŏk tro vang pơ long, dêh char Gia Lai hlôi tơ lĕch trong jang hăm 40 hơ nih pơ long tơ pă ( tŏk 1 lăm pơ long pơ têng hăm sơ năm 2021) hăm 623 lăm pơ long, hơ vơn 2400 kang ƀô̆, thây kô pơ tho, bơ ngai jang vang jang kơ tă lơ̆m dôm khŭl kơ jơ nŭm vei lăng pơ long. Dang ei, anih jang hlôi athei rim hnam trưng jang đang tơ drong pơ tho hŏk kiơ̆ ƀlep trong tơ lĕch jang. Kŭm hăm ‘noh, rim hnam trưng klăih song hŏk tro vă đei trong hŏk ƀai đei iŏk yua hloh, tơ gŭm đe oh mơ̆t pơ long ‘lơ̆ng.

Thuem: Tơ blơ̆