VOV4.Bahnar - Dơ nŏ anih vei lăng kon pơ lei dêh char Gia Lai ‘nao pơ gơ̆r hop akŏm hơ len năng tơ drong jang 9 khei, tơ lĕch tơ drong vă jang lơ̆m 3 khei hơ tuch sơ năm. Kơ dră vei lăng kon pơ lei dêh char Gia Lai athei dôm bơ ngai jang lơ̆m Dơ nŏ anih vei lăng kon pơ lei dêh char, dôm anih jang kơ pal, tơ ring tơ rang tơ guăt 1 ƀơ̆r đon, adrin khŏm chĕp kơ̆l pơ gơ̆r, bơ̆ jang tôch ai, vang jang hơ doi, tơ gŭm băl vang tơ lĕch jang hrơ̆ch ‘lơ̆ng dôm trong jang vă gơ̆h jang kĕh dôm tơ drong hơ găt, tơ drong jang atŏk tơ iung mŭk drăm, tơ pôl, vei sơ đơ̆ng tĕh đak sơ năm 2022.

Pơ ma lơ̆m hop akŏm, ƀok Nguyễn Hữu Quế- Kơ dră Anih tơ lĕch nơ̆r sơ kơ̆t, tơ mât jên jang dêh char Gia Lai ăn tơ băt: Gia Lai jĭ 1 lơ̆m dôm tơ ring tơ lĕch jên jang ming man tôch hiơ̆. Lơ̆m nŏh, anih vei lăng tơ drong tơ mât jên jang ming man kơ dêh char păng dôm anih jang kơ pal vei lăng dôm tơ drong jang tơm, đei jên jang lơ - tơ lĕch jên jang tŏ sĕt hlŏh. Pơ tih gia nhen tơ drong jang pơm Trong găh Hơ lĕch (đei jên jang truh 1.200 ti) dang ei ‘nao pơm đang hla ar, vă pơ gơ̆r chă anih iŏk jang; Tơ drong jang pơm trong Phù Đổng (plt Pleiku) athei lăng hơ len dơ̆ng tơ drong pơm hla ar. ‘Ngoăih kơ ‘nŏh, tơ drong dôm tơ ring ưh jăh jang hơ doi vă pơ jao tĕh kŭm ƀơm ưh ‘lơ̆ng truh dôm tơ drong jang hai.

Gia Lai lơ tơ drong jang ming man oei hiơ̆ hyĭn

Ƀok Nguyễn Hữu Quế- Kơ dră Anih tơ lĕch nơ̆r sơ kơ̆t, tơ mât jên jang dêh char Gia Lai pơ ma tơ ƀôh hăm tơ drong jang pơm trong Nguyễn Chí Thanh (plt Pleiku) păng trong tơ ƀưh dôm apŭng Chư Sê- Chư Pưh- Chư Prông (jăl trong tơ̆ apŭng Chư Pưh), akhan: “Trong Nguyễn Chí Thanh, plt Pleiku tam đei pơ jao tĕh kiơ vă anih vei lăng tơ lĕch jang. Anih vei lăng dang ei oei man trong tơ̆ dôm jăl ưh đei tơ hlăk. Apŭng Chư Pưh, mă ưh 'nŏh inh chĕp kơ̆l khul jur hơ len năng, athei apŭng jăh chưk pơ 'ngoăih 1,3km tĕh tơ̆ thĭ trơ̆n Nhơn Hoà. Kơ dră vei lăng kon pơ lei apŭng Chư Pưh 'nao kĭ hla ar hrŭ 'mong ăn 50 unh hnam, oei pă 34 unh hnam tơ ter trong gre 14 tam mă đei pơ jao.”

Kiơ̆ ƀok Nguyễn Hữu Quế, tơ drong tơm tơ lĕch jên jang hiơ̆ ‘nŏh yoa tơ drong hơ met ăn tơ drong jang tôch hiơ̆, tơ hlăk tăk mưh pơm hla ar păng hrŭ ‘mong jên tĕh. Mă lei, hăm lơ tơ drong jang pơ tơm tơ lĕch jang lơ̆m jăl khei mă IV ‘nŏh tơ drong tơ lĕch jên jang gô hrĕnh mơ̆n. Tơ̆ hơ năp kơnh, dôm tơ ‘ngla tơ mât jên jang jăh athei anih iŏk jang jang kiơ̆ mă ‘lơ̆ng dôm tơ drong hơ găt đơ̆ng luơ̆t tơ mât jên jang vă gơ̆h tơ lĕch jên jang trŏ khei 'năr hơ găt.

Khei 'năr âu ki, Anih tơ lĕch nơ̆r sơ kơ̆t tơ mât jên jang dêh char hlôi roi tơ ƀôh ăn Dơ nŏ anih vei lăng kon pơ lei dêh char Gia Lai tơ lĕch lơ hla ar chih nơ̆r pơ tho ăn dôm tơ 'ngla tơ mât jên jang hơ tŏk hrĕnh tơ drong tơ lĕch jên jang păng pơ jing 4 khul dăr hơ len, athei jăh bơ̆ jang, hơ met pơ 'lơ̆ng dôm tơ drong mơ mat tat, tơ hlăk tăk vă jăh tơ lĕch jên jang ming man kơ tĕh đak sơ năm 2022. Truh dang ei, tơ drong tơ lĕch jên jang ming man kơ dêh char lăp đei 31%, vă jê̆ dang ăi hăm kơ sô̆ jô̆ păh lăp kơ tĕh đak.

Găh tơ drong thu mong jên, dang ei akŏm đĭ đăng jên thu mong đei đơ̆ng dêh char ‘nŏh 4.100 ti, jur 30,7% pơ têng hăm khei âu sơ năm sơ̆. Ƀok Nguyễn Anh Dũng- Kơ dră Anih vei lăng jên hu dêh char Gia Lai ăn tơ băt, tơ drong tơm ‘nŏh dêh char oei tơ ƀâp mơ mat tat lơ̆m tơ drong thu mong jên yoa tĕh hăm lơ tơ drong jang. Ƀok Dũng tơ lĕch nơ̆r pơ ma vă hơ tŏk tơ drong thu mong jên lơ̆m dôm khei hơ tuch sơ năm: “Nhôn apinh Dơ nŏ anih vei lăng kon pơ lei dêh char akŏm jơ hngâm chĕp kơ̆l pơ gơ̆r dôm anih jang kơ pal hơ len năng dơ̆ng dôm tơ drong tơ mât jên jang đei iŏk yoa tĕh, vă jăh pơm kĕh hla ar hai, jăh sơng iŏk jên tơ mât jang, iŏk yoa dôm tơ drong ‘lơ̆ng, pơm ‘lơ̆ng ăn tơ drong thu mong jên hai. Tơ drong mă 2, nhôn jang hơ doi hăm Anih thuê̆ hơ len năng dôm kơ sô̆ jên vă thu lơ̆m 3 khei hơ tuch sơ năm vă pơm ‘lơ̆ng ăn tơ drong hơ găt thu mong jên sơ năm 2022”.

Ƀok Trương Hải Long- Kơ dră vei lăng kon pơ lei dêh char Gia Lai iung pơ ma

Hơ dai hăm dôm tơ drong tơ mât jên jang kơ tĕh đak păng thu mong jên, hop akŏm Dơ nŏ anih vei lăng kon pơ lei dêh char Gia Lai oei pơ ma tơ lĕch lơ tơ drong kăl kơ sek tơ lang nai nhen: hơ met pơ ‘lơ̆ng anih tơ mât jên jang, tơ drong jĭ tơ̆ ‘long, kon tơ rong, tơ drong jang tơ iung ming mŭk drăm, tĕch mơ dro tơ mam đơ̆ng choh jang xa tơ̆ tĕh đak đe… Pơ ma nơ̆r pơ tho lơ̆m hop akŏm, ƀok Trương Hải Long- Kơ dră vei lăng kon pơ lei dêh char Gia Lai athei kơ dră chĕp kơ̆l dôm anih jang kơ pal, tơ ring tơ rang lơ̆m dêh char tơ guăt 1 ƀơ̆r đon, jang hơ doi, tơ lĕch jang hloi dôm trong jang vă jang kĕh dôm tơ dỏng hơ găt, tơ drong jang mŭk drăm, tơ pôl sơ năm 2022 kơ dêh char: “Akŏm jơ hngâm tơ lĕch dôm tơ drong jang oei hiơ̆ pơ têng hăm trong jang hlôi tơ lĕch păng tơ lĕch dơ̆ng lơ trong jang vă hơ met pơ ‘lơ̆ng mơ mat tat, ưh kơ lăp lơ̆m tơ drong: thu mong jên, tơ lĕch jên jang ming man, dôm tơ drong jang tơ iung ming mŭk drăm, tơ pôl; tơ drong jang pơ gang, iŏk yoa tĕh tơ̆ dôm tơ ring; jang xa, tĕch mơ dro, tơ drong jĭ tơ̆ ‘long pơ tăm, kon tơ rong; tơ drong pơm glăi luơ̆t. Kơ dră chĕp kơ̆l dôm anih jang kơ pal, Dơ nŏ anih vei lăng kon pơ lei dôm apŭng, thĭ xăh jăh tơ lĕch dôm tơ drong jang mă đe Phŏ Kơ dră vei lăng kon pơ lei dêh char hlôi iung pơ ma"..

Kơ dră vei lăng kon pơ lei dêh char Gia Lai oei athei dôm bơ ngai jang lơ̆m Dơ nŏ anih vei lăng kon pơ lei dêh char, dôm anih jang kơ pal, tơ ring tơ rang mât mĭnh ƀơ̆r đon, khŏm chĕp kơ̆l pơ gơ̆r, adrin tôch ai, vang jang hơ doi, tơ gŭm băl tơ lĕch jang hrơ̆ch ‘lơ̆ng dôm tơ drong jang, trong jang vă jang kĕh dôm tơ drong hơ găt, jang atŏk tơ iung mŭk drăm, tơ pôl, vei sơ đơ̆ng tĕh đak sơ năm 2022.

                                                                                                                VOV Tây Nguyên

Dơ̆ng: Tơ blơ̆