Kiơ̆ kơ Anih vei lăng rim tơdrong jang ming man dêh char Gia Lai, akŏm kơsô̆ iŏk jang pơđĭ tơdrong jang ‘nao iŏk đei dang 42% kơjă pơm hla ar pơkăp man pơm hloh 1.226 ti hlak jên. Kăl kơ lăng truh, đei truh 6/7 hnam trưng jang hiơ̆ đơ̆ng 10 truh 15 năr, tơdrong tơm pơm ăn găh lơ yua đơ̆ng ưh kơ măh lơ bơngai jang hơgei. Tơ̆ hơnăp tơdrong kơhret athei jang đang tơdrong jang vă tơtom pơyua ăn sơnăm hŏk ‘nao, tơ ‘ngla tơmơ̆t jên jang hlôi hơnơ̆ng roi tơbăt kơ dôm bơngai iŏk jang, hơdai hăm apĭnh Anih vei lăng kon pơlei dêh char tơgŭm khŭl lĭnh ƀô̆ đô̆i, kŏng an, ƀô̆ đô̆i vei lăng tơring sơlam vang jang tơgŭm bơngai jang bơ̆jang.

Tơdrong jang đei akŏm jên tơmơ̆t jang hloh 1.516 ti hlak jên, ưh khan lăp pơyua ăn ‘meh vă hŏk pơhrăm đơ̆ng hŏk tro tơring sơlam mă oei đei tơdrong ‘lơ̆ng gĭt kăl găh vei sơđơ̆ng tơdrong hơrih sa tơpôl, hơtŏk ‘lơ̆ng kon pơlei hlôh vao păng pơm tơdrong ‘lơ̆ng hơtŏk tơiung kơjăp tơring sơlam Gia Lai.