VOV4.Bahnar - Năr 4/7, Khŭl kơdră chĕp pơgơ̆r Dơnŏ anih Đảng dêh char Gia Lai jăl XVI (jăl jang 2020-2025) hlôi pơgơ̆r Hop akŏm ‘măng mă 8. Hop akŏm hlôi ‘măn jơ ‘năr lăng hơlen păng tơgop nơ̆r 2 tơdrong jang tơbăt hơdăh găh tơjur tĕnh koăng păng kơ jăp ŭnh hnam dơnŭh lơ̆m kon kông jăl jang 2017-2020 păng trong jang trŭh sơnăm 2025; Hla bơar chĭh tơbăt pơtôch 3 sơnăm jang kiơ̆ Tơdrong tơchơ̆t găh vei lăng păng atŏk tơ iung ‘long pơgang lơ̆m dêh char Gia Lai trŭh sơnăm 2025, lăng trŭh sơnăm 2030.

Tơring pơtăm ‘long pơgang tơ̆ apŭng Chư̆ Sê, dêh char Gia lai pơjing tơdrong jang ăn lơ bơngai jang lơ̆m apŭng

Hlŏh 5 sơnăm jang kiơ̆ Tơdrong tơchơ̆t 05-NQ/TU, bơ̆ jang tơjur dơnŭh pơma atŭm păng tơjur dơnŭh lơ̆m kon pơlei kon kông hlôi đei rim hơnĭh jang đảng, kơdră tơring tơ̆ dêh char Gia Lai lăng jing tơdrong jang kăl hlŏh lơ̆m trong tơlĕch jang atŏk tơ iung mŭk drăm-tơpôl kơ tơring. Ŭnh hnam dơnŭh lơm dêh char tơjur vă jê̆ 13%, ŭnh hnam dơnŭh lơ̆m kon kông tơjur hlŏh 26%, jơnei lơ hlŏh Tơdrong tơchơt tơlĕch ăn. Găh tơdrong Tơchơ̆t vei lăng păng atŏk tơ iung ‘long pơgang lơ̆m dêh char Gia lai trŭh sơnăm 2025, lăng trŭh sơnăm 2030, dêh char jei iŏk đei jơnei hơ iă. Lơ̆m au lơ tơring hlôi pơjing tơring pơtăm ‘long pơgang akŏm mĭnh ƀôt, hơnhăk đei iŏk yua kơ jăp. Mĭnh ƀar hơnĭh jang hlôi iŏk đei jơnei pơ̆ih trong tơgop tơjur dơnŭh, atŏk tơ iung mŭk drăm, sơđơ̆ng erĭh sa ăn kon pơlei.Kiơ̆ kơ ‘nŏh, trŭh sơnăm 2030, Gia Lai hơdrin lang să ‘long pơgang dêh char trŭh 20.000ha.

Tơblơ̆ nơ̆r: Amazưt