VOV4. Bahnar - Trŭh au kơnh, hơnĭh jang pơgang dêh char Gia Lai hlôi hơmet ăn rim tơdrong rơvơn vă ƀet vaccine Covid-19 ăn hơ iŏh đơ̆ng 5 sơnăm trŭh vă jê̆ 12 sơnăm. Ƀok Nguyễn Đình Tuấn - Kơ iĕng Kơdră chĕp pơgơ̆r Dơnŏ anĭh vei lăng jang pơgang dêh char Gia Lai tơbăt: Hrei au, tơ̆ dêh char Gia Lai đei hlŏh 212.000 ‘nu hơ iŏh đơ̆ng 5 sơnăm trŭh vă jê̆ 12 sơnăm. Vă hơmet ăn ‘lơ̆ng hơ iă vă ƀet vaccine tang găn Covid-19 ăn hơ iŏh au, khei năr au ki, Dơnŏ anĭh vei lăng jang pơgang dêh char Gia Lai hlôi pơjao ăn Hơnĭh tơm jang Dăr hơlen jĭ jăn pơgơ̆r pơtho tơbăt ăn kang ƀô̆ jang pơgang tơring găh bơ̆ jang khăm hơlen, ƀet păng hơmet pơ ‘lơ̆ng đơ̆ng rŏng ƀet; pơtho pơhrăm ăn khul jang tơgŭm bơ̆ jang pơm hla bơar, vei lăng sơđơ̆ng tơ̆ hơnĭh ƀet bơ̆ng. Tơchĕng hơlau, tơdrong ƀet bơ̆ng gô đei pơgơ̆r tơ̆ rim hnam trương păng rim hnam pơgang tơring lăp đơ̆ng rŏng Dơnŏ anĭh tơm vei lăng jang pơgang klăh asong ăn vaccine; hơ iŏh đơ̆ng 5 trŭh vă jê̆ 12 sơnăm gô đei ƀet vaccine mư̆h đei mĕ ƀă dăh mă bơngai dơ̆ng pang ăn asong.

Tơblơ̆ nơ̆r: Amazưt