Đơ̆ng rŏng dôm 'măng 'mi tih, đak tơ̆ hơla gơng ro mât tơ̆ plei Thanh Sơn, xăh Chư A Thai tôch jăng. Ƀok Vi Văn Trượt, Bí thư Chi ƀô̆ pơm hloi Bơngai pơgơ̆r pơlei tơtom năm truh vă phĭn, hơtŏk lơ̆m grŭp Zalo, tơtă ăn kon pơlei kơchăng mưh yak vih vât. Rơnĕh sơnăm 1995, hŏk cử nhân luơ̆t păng adrol ki hlôi đei bơ̆ jang tơ̆ xăh, đơ̆ng rŏng kơ tơmât hơdai, 'nhŏng Trượt vih bơ̆ jang tơ̆ plei Thanh Sơn đei tơmât hơdai đơ̆ng 3 pơlei so, hăm 401 unh hnam hăm dang 1.760 'nu bơngai, mă lơ 'nŏh jĭ kon pơlei kon kông.

Tơring xă, kơsô̆ kon pơlei lơ pơm ăn ƀok pơgơ̆r pơlei oei mơlôh athei chă trong jang hrĕnh ƀiơ̆ mă lei oei jê̆ hăm kon pơlei. Đơ̆ng rŏng hloh 2 khei iŏk jang tơdrong jang 'nao, 'nhŏng Trượt pơjing grŭp Zalo chih tơmât hloh 200 unh hnam, vei kơjăp grŭp đơ̆ng anih jang chinh trĭ, hơdai hăm Fanpage Facebook păng loa pơre nơ̆r vă pơtruh kơtơ̆ng ang. 'Nhŏng oei pơtho ăn kon pơlei iŏk yua VNeID, chih tơmât ƀao hiêm tơpôl, ƀao hiêm pơgang păng pơm hla ar trư̆k tuyê̆n. Mă đơ̆ng thoi noh ră, mưh đei tơdrong plơ̆ng ‘nŏh 'nhŏng oei hơnơ̆ng năm truh tơ̆ rim unh hnam:

“Dang ei, tơdrong jang tơ̆ pơlei tôch lơ păng athei jur truh tơ̆ anih vă băt hơdăh tơdrong pơmat tat đơ̆ng kon pơlei thoi yơ 'mơ̆i mă gơ̆h jang đang tơdrong jang; đơ̆ng rŏng 'nŏh athei gơih nơ̆r pơma ăn anih jang kơpal mă ưh ‘nŏh iŏk hla ar đơ̆ng anih jang kơpal gơih, athei jang hăm kơmăy tĭnh ngăl. Dang ei, inh oei jang kiơ̆ vă pơtho kon pơlei tơmât tôm hla ar lơ̆m VneID vă kon pơlei gơ̆h iŏk yoa roi ƀônh”.

Đơ̆ng rŏng kơ tơmât hơdai, plei D’Rốc, xăh Chư A Thai đei hlŏh 500 unh hnam, hăm 8 hơdrĕch hơdrung arih xa hơdai. Ƀok Nguyễn Công Quân, bơngai đei lơ sơnăm pơm Ƀok pơgơ̆r pơlei păng Kơdră vei lăng Khul linh so, hơnơ̆ng đei kon pơlei lui pôk pơm dơ̆ng Ƀok pơgơ̆r plei 'nao. Băt hơdăh rim anih kon pơlei oei xa, dôm anih hơmơt teh hơlih păng dôm jăl trong hơnơ̆ng đei đak lơ̆p mưh 'mi tih, ƀok kơchăng hơlen năng, roi tơbăt vă kon pơlei tang găn.

“Pơtih gia nhen Anih jang mŭk drăm gơih nơ̆r tơroi, găh tơdra hơdrol tŏ 'mi kial ‘noh bơ̆n athei roi tơbăt, chih hơtŏk lơ̆m grŭp hloi vă kon pơlei băt. Lơ̆m tơdrong choh jang xa gô đei tơdrong hiôk, ‘lơ̆ng ƀiơ̆ mưh bơ̆n băt hơdăh rim tơdrong trŏ ƀlep. Tơdăh vă rei ƀa noh jăh rei hloi vă ƀa gơ̆h bluh jing ‘lơ̆ng, dăh mă athei gơ̆t lê̆ ‘mơ̆i”.

Đơ̆ng 23 pơlei so, xăh Chư A Thai hlôi hơmet oei pă 13 pơlei, đei 8 ‘nu ƀok pơgơ̆r pơlei păng 5 Ƀĭ thư Chi ƀô̆ pơm hloi ƀok pơgơ̆r pơlei. Đĭ đăng ƀok pơgơ̆r pơlei đơ̆ng rŏng hơmet ming đei hŏk đơ̆ng lăm 12 tŏk tơ̆ kơpal, gơ̆h yoa kơmăy tinh păng điên thoăi hơgei. Đơ̆ng rŏng kơ hơmet ming bơngai jang, xăh hơnơ̆ng hơmet pơ 'lơ̆ng tơdrong roi tơbăt, sek tơlang, hơlen năng rim unh hnam tơnuh, vei lăng tơdrong man hnam păng tơdrong sơđơ̆ng; hơdai hăm 'nŏh hơmet kơjăp tơdrong jang hơdoi đơ̆ng ƀok pơgơ̆r pơlei hăm Khul jang đảng, Mặt trận, Công an xăh păng dôm khul grŭp.

Ƀok Nguyễn Hữu Khóa, Phŏ Bí thư Đảng, Phŏ Kơdră Anih vei lăng kon pơlei xăh Chư A Thai ăn tơbăt, khul âu oei iŏk jang hloi tơdrong tơgŭm ăn kon pơlei jang kiơ̆ trong pơm hla ar hăm kơmăy sô̆: “Đe ƀok pơgơ̆r pơlei đơ̆ng rŏng kơ tơmơ̆t hơdai hlôi băt hơdăh rim tơdrong, iŏk yua điên thoăi hơgei păng dôm grŭp Zalo, kơmăy kơmŏk vă gơ̆h băt hơdăh tơdrong jang. Khul đe ƀok pơgơ̆r pơlei oei hơdrin jang hơdai hăm bơngai jang lơ̆m khŭl tơplih hăm kơmăy sô̆ chă tơgŭm ăn kon pơlei chih tơmơ̆t rim tơdrong kăl lơ̆m tài khoản VneID, pơm hla ar trư̆k tuyê̆n, kla jên trư̆k tuyê̆n, pơih lăng, hŏk pơhrăm hăm kơmăy”.

Lơ̆m dêh char Gia Lai, kơsô̆ pơlei, kueng kơphô̆ hlôi tơjur hloh 48% đơ̆ng rŏng kơ hơmet ming. Dang ei dêh char đei 1.400 ‘nu ƀok pơgơ̆r pơlei, kueng kơphô̆. Lơ̆m noh 183 'nu bơngai pơm hloi Ƀĭ thư Chi ƀô̆. Kăl kơ lăng ‘nŏh, đei 10 'nu bơngai hŏk kơpal kơ đăi hŏk, (đei 1 'nu tiến sĩ păng 9 'nu bơngai đei hŏk đơ̆ng rŏng kơ đăi hŏk).

Ƀok Nguyễn Thanh Vũ, Phŏ Kơdră Anih jang Nô̆i vŭ dêh char ăn tơbăt, tơring oei adrin hơmet pơ 'lơ̆ng tơdrong hŏk pơhrăm, ƀơ̆r pơma xa păng tơdrong jang kiơ̆ kơmăy sô̆ đơ̆ng đe ƀok pơgơ̆r pơlei, kueng kơphô̆ vă khul âu gơ̆h bơ̆ jang ‘lơ̆ng tơdrong jang lơ̆m chăl ‘nao: “Đơ̆ng rŏng kơ hơmet ming, roi đunh khul jang âu gô đei hơmet roi 'lơ̆ng. Kiơ̆ nơ̆r athei đơ̆ng Anih pơgơ̆r Trung ương păng dêh char ‘noh kăl đei tơdrong hlôh vao, jang hăm kơmăy kơmŏk đơ̆ng đe sư mă hrĕnh. Dang ei anih jang điên tư kơ dêh char hlôi truh hăm pơlei pơla, athei iŏk yoa kơmăy kơmŏk mă gơ̆h, vă bơ̆ jang roi đei yoa. Yoa thoi noh, nơ̆r athei đei tơlĕch hăm đe sư ‘nŏh athei hlôh vao hơdăh tơdrong tơplih hăm kơmăy sô̆.”

Đơ̆ng rŏng kơ tơmơ̆t hơdai, lơ tơring roi xă oei tơlĕch hơnăp jang roi trăp ăn kơ ƀok pơgơ̆r pơlei, ƀok pơgơ̆r kueng kơphô̆. Mưh đei hơmet pơ 'lơ̆ng găh đon rơgei, jang gơ̆h păng tơplih 'nao trong jang, đe sư gô hơnơ̆ng jing gơng tơƀưh kơjăp ‘lơ̆ng đơ̆ng khul kơdră pơgơ̆r hăm kon pơlei./.