VOV4.Bahnar - Pơgê năr 1/4, Hop akŏm ƀar păng ‘măng mă 22 kơ ƀar păh Quân khu V (Khŭl Ƀô̆ đô̆i kon pơlei Việt Nam) hăm Quân khu I (Khŭl lĭnh tĕh đak Campuchia) đei pơgơ̆r tơ̆ ‘Măng sơlam apŭng plĕnh tĕh Lệ Thanh, apŭng Đức Cơ, dêh char Gia Lai. 

Tơ̆ Hop akŏm, Bộ Tư lệnh Quân khu 5 (Khŭl Ƀô̆ đô̆i Kon pơlei Việt Nam) hăm Bộ Tư lệnh Quân khu 1 (Khŭl lĭnh Tĕh đak Campuchia) hlôi pơma dơnŭh păng drơng mĭnh nơ̆r rim tơdrong jang hơdoi lơ̆m sơnăm 2022. Kiơ̆ kơ ‘nŏh, ƀar păh drơ̆ng mĭnh nơ̆r hơnơ̆ng atŏk kơtang hlŏh dơ̆ng bơ̆ jang pơtho pơhrăm, pơrô̆ pơtho tơbăt ăn kang ƀô̆, ƀô̆ đô̆i păng kon pơlei ƀar tĕh đak, mă kăl khŭl mơlô̆h hlô̆h vao hlŏh dơ̆ng tơdrong tơgoăt tơgoăl pôm nơ̆r ƀơ̆r đon ƀar păh tĕh đak; hơnơ̆ng vei lăng sơđơ̆ng chĭnh trĭ, sơđơ̆ng tơpôl tơ̆ tơring sơlam tĕh đak; tang găn tơdrong đe mơt lĕch glăi; iung tơ jră phă pơrăm khŭl yoch klŏh klĕch tĕh đak.

Tơblơ̆ nơ̆r: Amazưt