VOV4.Bahnar - Pơgê năr 11/3, Kŏng ang dêh char Gia Lai pơgơ̆r Hop akŏm tơgop nơ̆r tơ iung pơjing 2 tơdrong vă pơjing khôi luơ̆t ‘nŏh: Khôi luơ̆t khŭl vei lăng sơđơ̆ng dơ̆ng kơ jăp tơ̆ tơring păng trong vă jang Khôi luơ̆t Vei lăng sơđơ̆ng trong nơnăm trong tĕh. Vang năm hop akŏm đei bơngai tang măt Khŭl kơdră tang măt Kuôk hô̆i dêh char Gia Lai, rim hơnĭh bơ̆ jang.

Rup hop akŏm

Găh Khôi luơ̆t Khŭl vang vei lăng sơđơ̆ng dơ̆ng kơ jăp tơring, rim nơ̆r tơgop jei drơ̆ng kiơ̆ hơnĭh dơ̆ng, hơnăp jang, tơdrong kăl kơ khŭl vang iung jang vei lăng sơđơ̆ng tơring. Rim nơ̆r tơgop jei akhan, khŭl vei lăng sơđơ̆ng dơ̆ng kơ jăp tơ̆ tơring ‘nŏh jing gơng tơrŏh klŏh klĕch gĭt găl kơ khŭl Kŏng ang hăm đĭ đăng kon pơlei. Hăm tơdrong vă pơjing Khôi luơ̆t vei lăng sơđơ̆ng trong nơnăm trong tĕh, rim nơ̆r tơgop akhan, sơđơ̆ng trong nơnăm, trong nơnăm kơ jăp ‘lơ̆ng păng gre kơdau trong nơnăm jing tơdrong kăl hlŏh ăn tơ iung pơjing, pơm tơlĕch rim khôi luơ̆t tơm vă hơmet pơ ‘lơ̆ng rim trong bơ̆ jang.

Tơblơ̆ nơ̆r: Amazưt