Đon hli pơngơ̆t kơ teh hơlih yoa đơ̆ng ‘mi kial kơsô̆ 13 ƀât hơtuch sơnăm 2025 oei đei hơnơ̆ng. Rơbâu m3 teh tơmo đơ̆ng kông Phương Mai hơlih kơtĭt 3 tŏ hnam, pơm ăn 1 ‘nu bơngai lôch, 1 ‘nu bơngai rơka păng lơ unh hnam athei pôk hnam tŏk oei tơ̆ nai. Ƀok Lê Văn Phụng, oei tơ̆ kueng kơphô̆ 9, phường Quy Nhơn hơmĕng, tơdrong man dur găn teh hơlih gô jing "khêl" vă vei lăng tơring kon pơlei oei xa tơ̆ hơnăp dôm tơdrong tơplih roi kơnê̆ đơ̆ng tŏ ‘mi kial: "Kăl dêh yoa pơyan ‘mi kial vă jê̆ truh bơih. Tơdăh tơdrong jang ming man ưh tom ‘nŏh pơyan ‘mi gô tơƀâp lơ pơmat tat. Kon pơlei hơpơi ‘mĕh teh đak jăh man đang dur găn teh hơlih âu mă kơjăp vă kon pơlei gơ̆h sơđơ̆ng jơhngâm."

Đơ̆ng rŏng kơ mong hơmet jên man, Anih vei lăng kon pơlei phường Quy Nhơn tơlĕch tơdrong jang man dur găn teh hơlih đơ̆ng kông tơ̆ Hải Minh ‘ngoăih kơ jên jang hlŏh 10,2 ti. Tơdrong jang man dur găn teh hơlih đei tai kơjung 65m, jung 4m, đei hloi hơbong đak ro đơ̆ng jơ̆ng kông truh tơ̆ đak dơsĭ vă pơm tơjur ƀiơ̆ đak rô jăng, đak tơjroh xa, jing đei teh hơlih lơ̆m pơyan ‘mi.

Ƀok Nguyễn Quốc Hùng, bơngai tang măt ăn anih ming man tơroi, vă jang ‘lơ̆ng trŏ năr hơgăt, anih iŏk jang hơnơ̆ng ăn dang 20 ‘nu công nhân kŭm hăm kơmăy kơmŏk, pơgơ̆r bơ̆ jang hơnơ̆ng: "Tơmam đơ̆ng đak dơsĭ, kông đak dơsĭ chơ mât tơ̆ tơnŏk duk, lơ̆m trong chơ mât tơ̆ anih mong tơmam đei lơ trong iĕ kơna anih iŏk jang pơtruh hloi lơ gre tŭn, chơ chuĕn prăt măng prăt năr vă gơ̆h đei tôm tơmam ming man tơtom, man dur găn teh hơlih vă jăh man đang mă hrôih."

Sơnăm 2026, dêh char Gia Lai pơ ‘nhŏ jên ăn dôm tơdrong jang tang găn păng hơmet pơ ‘lơ̆ng hiong răm đơ̆ng sar bar, tŏ ‘mi kial kơnê̆ tơ̆ lơ tơring. Hơdrô̆ phường Quy Nhơn đei tơlech ăn hlŏh 52,7 ti hlak jên vă hơmet ming, man dơ̆ng dôm anih hiong răm đơ̆ng sar bar tŏ 'mi kial kơnê̆; truh dang ei hlôi man đang 5 anih đei hnam hŏk, anih jang kơ kueng kơphô̆ păng anih jang kơ teh đak. Lơ̆m noh, tơdrong jang man dur găn teh hơlih tơ̆ Hải Minh đei năng jĭ tơdrong jang gĭt kăl athei jang đang adrol kơ pơyan 'mi vă vei lăng 'lơ̆ng tơring kon pơlei oei xa tơ̆ hơla jơ̆ng kông Phương Mai.

Kiơ̆ ƀok Nguyễn Đức Toàn, Kơdră vei lăng kon pơlei phường Quy Nhơn, tơdrong jang dang ei man đei dang 80% bơih. Khul kơdră pơgơ̆r tơring oei jang hơdoi hăm anih ming man akŏm jơhngâm, khul bơngai jang, tơmam drăm bơ̆ jang tôch ai vă gơ̆h jang đang trŏ năr hơgăt: "Anih iŏk jang hlôi akŏm khul jang, tơmam drăm, kơmăy kơmŏk păng dôm tơmam kăl nai vă hơtŏk hrĕnh tơdrong ming man. Truh dang ei tơdrong ming man hlôi jang đei dang 80% bơih. Anih vei lăng kon pơlei phường đei nơ̆r pơtho athei hơtŏk hrĕnh tơdrong ming man vă adrol kơ pơyan ‘mi kial truh dur găn teh hơlih âu gô đei man đang, vă vei lăng ‘lơ̆ng tơmam drăm păng tơdrong arih kơ kon pơlei.".

Hăm đon pơhnŏng khŏm jang đang adrol kơ pơyan ‘mi, tơdrong jang ưh lăp vă hơmet pơ ‘lơ̆ng hiong răm đơ̆ng sar bar, tŏ 'mi kial kơnê̆ đĕch mă oei tơgop vei lăng sơđơ̆ng 'lơ̆ng tơdrong arih, tơmam drăm kơ kon pơlei tơ̆ hơla jơ̆ng kông Phương Mai, tơgŭm ăn kon pơlei tơ̆ phường Quy Nhơn, dêh char Gia Lai hơđơ̆ng jơhngâm arih xa tơ̆ hơnăp dôm tơdrong tơplih roi đunh roi kơnê̆ đơ̆ng tŏ 'mi kial.