Dôm năr ‘nâu, tơ̆ anih jang pơjing ming anih oei xa Kiên Long, xăh Bình An, dêh char Gia Lai hơnơ̆ng ƀôh đei lơ gre, kơmăy kơmŏk bơ̆jang. ‘Nâu jĭ tơring oei xa ‘nao tih hlŏh lơ̆m 9 tơring pơyoa ăn tơdrong jang pơm trong gre kơdâu hrĕnh Quy Nhơn - Pleiku, xă dang 10 ha.

Vă jăh pơjao lơ̆m khei 7, đơ̆ng khei 3 sơnăm ‘nâu, anih iŏk jang krao akŏm dôm jĭt tŏ kơmăy kơmŏk, pơgơ̆r bơ̆ jang prăt măng prăt năr. Ƀok Nguyễn Trung Cần, bơngai tang măt ăn anih iŏk jang tơroi, truh dang ei, tơdrong bơ̆ jang hlôi jang đei dang 80%, jang đang dôm tơdrong pơ ‘nhŏ jang hơdrol vă pơjao 119 lơ̆m kơsô̆ 250 lô teh ăn tơring: “Mưh iŏk đei teh đei tôm tơdrong ‘lơ̆ng vă tơlĕch jang ming man, anih jang akŏm hlŏh 30 tŏ gre tih chơ chuĕn, 10 tŏ kơmăy kôch, 6 tŏ kơmăy chưk, 6 tŏ gre lu kŭm hăm kơhrĕng ‘nu công nhân bơ̆ jang hơnơ̆ng, jô̆ hloi tơ̆ kơmăng, vă gơ̆h jang đang trŏ năr hơgăt."

Tơ̆ 9 tơring oei xa ‘nao tơter trong gre kơdâu hrĕnh, anih jang, trong nơnăm đei tơlĕch jên man hrơ̆ch ‘lơ̆ng, đei unh điên tơ̆k hơdăh, đei đak yoa, đei kap kơmăy roi tơbăt păng anih hơmet đak ‘mê̆ ‘mach, pơjing um ai ‘nao ‘lơ̆ng rŏ.

Iŏk đei nơ̆r tơroi năm ƀŏk thăm hla ar vă rơih teh, ƀok Trần Văn Thông, tơ̆ plei Kiên Long, xăh Bình An, chơt hơiă yoa tơ̆ anih oei xa ‘nao đei tôm tơdrong ‘lơ̆ng, hiôk hian ƀiơ̆: “Teh tơ̆ tơring oei xa ‘nao lai yơ kŭm tŏ sĕt ƀiơ̆ mă lei tơdrong ‘lơ̆ng rŏ ‘nŏh ‘lơ̆ng ƀiơ̆ tơpă. Tơ̆ âu jê̆ trong gre 19B, trong yak tôch hiôk hian. Tơdrong tơmât jên man anih pơtruh đak rơgoh kŭm nhen dôm anih kăl nai jŭm dăr tơring oei xa ‘nao kŭm đei lơ tơdrong hiôk, ‘lơ̆ng ƀiơ̆."

Tơdrong tơroi hơdăh trong chĕng song lô, hơmet anih oei xa ‘nao kŭm hăm tơlĕch jang hrơ̆ch ‘lơ̆ng hlôi pơjing đei đon lui, đon tơgŭm đơ̆ng kon pơlei. Mă loi lơ̆m jơnăr gô pơm tơtrơp hơmet đĭng pơtruh đak rơgŏh, Anih vei lăng kon pơlei dêh char Gia Lai oei tơgŭm jên khoan đak kuay ăn dang 150 unh hnam tơ̆ 5 tơring oei xa ‘nao tơm, tơgŭm ăn kon pơlei hơđơ̆ng jơhngâm tŏk oei tơ̆ plei hle. Ƀok Thái Văn Điểm, Phŏ Kơdră Anih jang mŭk drăm xăh Bình An, dêh char Gia Lai, ăn tơbăt: “Anih vei lăng tơdrong jang kơ xăh ‘nao krao unh hnam kon pơlei truh tơ̆ Anih vei lăng xăh Bình An pơm hla ar chĕng song lô teh. Lơ kon pơlei tôch hơiă yoa teh đak tơlĕch jên jang, pơm hơmet anih jang, trong nơnăm hrơ̆ch ‘lơ̆ng."

Trong gre kơdâu hrĕnh Quy Nhơn - Pleiku kơjung dang 125 km, akŏm đĭ đăng jên jang hlŏh 43.700 ti hlak jên. Vă pơyoa ăn tơdrong chưk pơ ‘ngoăih teh, dêh char Gia Lai pơjing 9 tơring oei xa ‘nao hơdai păng 2 tơring oei xa hrâu, hơmet anih oei xa ăn hlŏh 500 unh hnam đei ƀơm truh.

Truh dang ei, 9 tơring oei xa ‘nao đei pơjing vă đang bơih. Ƀok Phạm Sĩ Duy Nhân, Anih vei lăng dôm tơdrong jang pơm trong păng anih pơyoa ăn kon pơlei dêh char Gia Lai ăn tơbăt, lơ tơring nhen Trà Sơn, Thuận Đức, Trường Định 2 păng Kiên Long hlôi man đang lơ anih kăl, pơjao teh vă tơring pơgơ̆r ƀŏk thăm hla ar, iŏk anih oei tơ̆ plei hle.

“Găh anih vei lăng, nhôn kơchăng ăn bơngai jang hơnơ̆ng hơlen năng tơ̆ anih ming man, jang hơdoi vang roi tơƀôh, dăr lăng anih iŏk jang, hơtŏk hrĕnh tơdrong jang, bơ̆ jang '3 ka, 4 kip' hơnơ̆ng, bơ̆ jang hloi tơ̆ kơmăng vă hơtŏk hrĕnh tơdrong ming man. Truh dang ei, tơring pơ ‘nhŏ hơdrol vă ăn kon pơlei tŏk oei hlôi pơjing đang păng pơjao ăn xăh chĕng song lô, hơmet teh oei ăn kon pơlei. Dôm tơring oei đei dơ̆ng, Anih vei lăng tơdrong jang oei adrin hơtŏk hrĕnh tơdrong ming man vă gơ̆h jang đang lơ̆m khei 7."

Tơdrong hơtŏk hrĕnh tơdrong jang pơm pơkĕh dôm tơring oei xa ‘nao tơter trong gre kơdâu hrĕnh Quy Nhơn- Pleiku tơ̆ Gia Lai ưh lăp tơgŭm ăn kon pơlei jăh đei tơdrong arih xa sơđơ̆ng đĕch, mă oei pơjing tơdrong ‘lơ̆ng, hiôk hian vă tơdrong jang đei tơlĕch jang trŏ năr hơgăt. ‘Nâu gô jing jơhngâm pran gĭt kăl vă tơguăt tơring, pơih xă anih păng pơjing jơhngâm pran vă jang tŏk mŭk drăm, tơpôl ăn tơring./.