Hop akŏm hơlen năng tơdrong jang đei đơ̆ng jang hơdoi đơ̆ng 2021–2025, atŭm hăm ‘nŏh drơ̆ng nơ̆r ăn trong jang đơ̆ng 2026–2030. Khei ‘năr âu ki, tơdrong pơvei jang hơdoi đơ̆ng Gia Lai păng dôm dêh char găh Pơbăh teh đak Lào tŏk pran lơ̆m rim tơdrong, đei iŏk yoa ‘lơ̆ng tơ̆ yăn âu. Gia Lai hlôi ƀơk 320 kơsuơ̆t jên hŏk ƀŏng, 1 sơnăm đei hlŏh 100 ‘nu hŏk tro Lào truh hŏk pơhrăm tơ̆ dêh char.

Găh tơmât jên jang, 15 anih tĕch mơdro Gia Lai tơlĕch tơdrong jang tơ̆ găh Pơbăh teh đak Lào hăm kơsô̆ jên jang hlŏh 595 triu USD. Dêh char kŭm tơgŭm dang 60 ti hlak jên man lơ anih jang gĭt kăl. Tơ̆ hop akŏm, kơdră chĕp kơ̆l dêh char Gia Lai păng kơdră chĕp kơ̆l 4 dêh char găh Pơbăh teh đak Lào kĭ pơkăp Hla ar jang hơdoi đơ̆ng 2026–2030, hăm trong jang hơnơ̆ng pơm hơtŏk rim tơdrong jang hơdoi, akŏm găh pơtho pơhrăm, jang pơgang, choh jang xa, tĕch mơdro, tơmât jên jang, jŏh ayŏ kơ dŏ xoang păng atŏk tơiung chă tơmang lăng.