VOV4.Bahnar - Hlŏh 1 giĕng âu ki, mưh ƀok Võ Ngọc Thành- Bí thư Khul kăn ƀô̆ pơ gơ̆r, Kơ dră vei lăng kon pơ lei dêh char đei ki luơ̆t kăt kơ chư̆k, Khul kăn ƀô̆ chĕp kơ̆l Đảng kơ Dơ nŏ anih vei lăng kon pơ lei dêh char Gia Lai hôp, pơ jao dơ̆ng tơ drong jang ăn dôm Phŏ kơ dră tơ̆ anih jang âu. 

Anih jang kơ Dơ nŏ anih vei lăng kon pơ lei dêh char Gia Lai

Kiơ̆ kơ ‘nŏh, ƀok Đỗ Tiến Đông- Phŏ kơ dră chĕp kơ̆l Dơ nŏ anih vei lăng kon pơ lei dêh char Gia Lai đei pơ jao tŏk chĕp kơ̆l pơ gơ̆r, vei lăng rim tơ drong jang găh hơ năp jang đơ̆ng Kơ dră vei lăng kon pơ lei dêh char. Ƀok Kpă Thuyên- Phŏ kơ dră vei lăng kon pơ lei dêh char Gia Lai pơ gơ̆r, vei lăng dôm tơ drong: choh jang xa, cham char; tơ drong jang găh hơ drĕch kon kông.

Yă Nguyễn Thị Thanh Lịch- Phŏ Kơ dră vei lăng kon pơ lei dêh char pơ gơ̆r, vei lăng dôm tơ drong găh: jŏh ayŏ kơ dŏ xoang, pơ tho pơ hrăm, jang pơ gang, vei lăng kơ sô̆ măt bơ ngai, tơ drong lui khop. Ƀok Hồ Phước Thành- Phŏ Kơ dră vei lăng kon pơ lei dêh char pơ gơ̆r, vei lăng grŭp jang mŭk drăm đei: Trong tơ lĕch jang, jên hu, jang kơ măy, tĕch mơ dro... 

Dơ̆ng: Tơ blơ̆