VOV4.Bahnar - Khei ‘năr tơ jê̆ âu, kơ jă đak xăng, đak dâu hơ nơ̆ng đei hơ met tơ jur ming. Mă lei kơ jă lơ tơ mam yoa kăl tơ̆ Gia Lai oei tôch măk, tam mă ƀôh jur kiơ.

Yă Nguyễn Thị Bé, bơ ngai tĕch ‘nhĕm nhŭng tơ̆ kơ chơ tơm Pleiku, plt Pleiku tơ roi: Dang 1 khei ‘nâu, kơ jă dôm kơ loăi ‘nhĕm nhŭng tŏk đơ̆ng 10 rơ ƀâu truh 20 rơ nâu 1 kĭ păng dang ei oei vei kơ jăp kơ jă ‘nâu. Kŭm kiơ̆ yă Bé, khei ‘năr âu ki, kơ jă tơmam vă rong kon tơ rong tŏk lơ pơm ăn tơ drong rong kon tơ rong kŭm hiong lơ jên jang. Tơ drong đak xăng, đak dâu jur kơ jă ưh đei ƀơm truh lơ tơ̆ kơ jă ‘nhĕm nhŭng yoa ‘nhĕm nhŭng tĕch kiơ̆ kơ jă nhŭng tŏk dăh jur: “Dang ei đe tĕch măk, ưh đei jur, ba răt măk bơih lơ liơ gơ̆h tĕch reh. Inh chă răt brei drau răt kơ jă tŏk đang kơ ‘nŏh dơ̆ng kơ tă ưh ƀôh jur kiơ. 3 kơ loăi ‘nhiĕm ‘lơ̆ng, kơ loăi 1 ‘nŏh 125 rơ bâu 1 kĭ, kơ ting mir ‘nŏh 160 rơ bâu, 155 rơ bâu. Lơ kơ loăi, ‘nhĕm blu ‘nŏh 110 rơ bâu 1 kĭ. Dang ei tĕch ưh kơ hlot ‘nŏh ba răt nhŭng tŏ sĕt ƀiơ̆, chă tĕch tŏ sĕt ƀiơ̆, bơ ngai rong dang ei ưh ‘mĕh tơ jur kơ jă nhŭng, lơ liơ ba gơ̆h tơ jur kơ jă ‘nhĕm nhŭng.”

Kơ jă dôm tơ mam yoa kăl tơ̆ dôm kơ chơ lơ̆m plt Pleiku tam đei jur kiơ

Kiơ̆ yă Nguyễn Thị Dung, tơ ‘ngla anih tĕch mơ dro Dung Dung tơ̆ Kơ chơ tơm plt Pleiku, dang 3 khei ‘nâu, anih tĕch mơ dro yă tơ ƀâp lơ mơ mat tat, rim tơ mam tŏk kơ jă ngăl, tŏk dang 10% kơ na bơ ngai răt jur lơ. Kŭm kiơ̆ yă Dung mơ̆n, yoa khei ‘năr kĭ pơ kăp hăm băl đơ̆ng anih rong, pơm tơ lĕch păng anih tĕch mơ dro kơ na tơ drong tơ jur kơ jă âu tam mă gơ̆h pơm kiơ̆ dang ei hloi: “Dang ei tơ drong răt iŏk tơ mam ưh pran, tơ drong tĕch mơ dro đơ̆ng dôm bơ ngai pơ dro kŭm ưh đei. Kơ lih yoa dang ei dôm tơ mam ƀơm truh đak xăng, đak dâu tŏk lơ ngăl, kon pơ lei ưh ‘mĕh răt kơ na tơ mam tĕch ưh gan hlot lơ nhen adrol ki”

Iŏk đơ̆ng blŭng khei 7 truh dang ei, kơ jă đak xăng lơ̆m tĕh đak hơ nơ̆ng hơ met tơ jur ming, jur vă jê̆ truh 7 rơ bâu hlak. Mă lei, pha hăm kơ jă đak xăng, đak dâu đei tơ jur, kơ jă dôm tơ mam yoa nhen ‘nhĕm, ka, dôm kơ loăi ‘nhot, ƀum, plei ‘long tơ̆ lơ kơ chơ lơ̆m plt Pleiku, dêh char Gia Lai oei tôch măk pơm ăn kon pơ lei tơ ƀâp lơ tơ drong mơ mat tat. Yă Lê Thị Hoa, oei tơ̆ phường Phù Đổng, plt Pleiku, tơ roi, hăm kơ jă dôm tơ mam yoa kăl oei tŏk hơ nơ̆ng nhen hrei ‘nâu, athei yă ‘mơ ‘met ƀiơ̆ mưh năm kơ chơ: “Yă kiơ kŭm măk ƀiơ̆ pơ têng hăm adrol ki, nhen đak kho, lơ kơ loăi…Hơ drol ki bơ̆n răt 1 kơ chô̆ ‘nhot ‘nŏh 5 rơ bâu dang ei tŏk truh 7 rơ bâu. Rim tơ mam măk ngăl ‘nŏh bơ̆n athei ‘mơ ‘met ƀiơ̆, ưh đei răt mơ̆ng kơ vă nhen adrol ki bơih.”  

Kon pơ lei Gia Lai năm truh tơ̆ dôm siêu thị vă răt tơ mam hăm kơ jă lăp ƀiơ̆

Yă Châu Hoàng Thy, Phŏ kơ dră chĕp kơ̆l Siêu thị Coopmark Pleiku ăn tơ băt, tơ̆ hơ năp tơ drong jur tŏk đơ̆ng đak xăng, đak dâu, rim siêu thị jang hơ doi hăm dôm anih pơ truh vă đei trong tơ jur kơ jă truh âu kơnh ăn dôm grŭp tơ mam yoa kăl. Lơ̆m nŏh năng kăl truh vei sơ đơ̆ng kơ jă dôm kơ loăi phe, ‘nhĕm nhŭng, ‘nhĕm iĕr, 1,2 kơ loăi đak tŏh, tơ mam ƀâu phu vă pai xa, kŭm nhen dôm kơ loăi tơ mam xa kro nai.

“Nhôn đei trong tơ gŭm ăn bơ ngai răt nhen pơm kiơ̆ tơ drong răt lơ tơ gŭm tih, răt 1 – hơ păh 1 mă ưh ‘nŏh tơ drong tơ jur kơ jă 50%. Hơ nơ̆ng 2 giĕng nhôn đei 1 hla ar chih găh tơ drong răt tơ mam, lơ̆m nŏh nhôn chih tơ mât tôm hơ năn tơ mam đei dang hlŏh 3000 tơ mam đei vei sơ đơ̆ng kơ jă vă tơ gŭm ăn bơ ngai răt yoa lơ̆m khei ‘năr kơ jă rim tơ mam tŏk nhen hrei ‘nâu. Nhen tơ mam hơ drih tơ̆ nhôn đei: ‘nhĕm nhŭng, ‘nhĕm rơ mo, ‘nhĕm iĕr kŭm nhen ka hơ drih, ‘nhot, ƀum, plei ‘long nhôn ưh đei hơ tŏk kơ jă lơ̆m khei ‘năr kơ jă tơ mam oei tŏk tôch dêh nhen hrei ‘nâu”

Khul jang kơ pal kơ dêh char Gia Lai hơ len năng tơ drong ‘lơ̆ng đơ̆ng tơ mam vă găn tơ mam ya, tơ mam ưh ‘lơ̆ng

Vă vei kơ jăp tơ drong tĕch mơ dro, tang găn hơ lĕnh pơ dăr, pơm glăi luơ̆t lơ̆m tơ drong tĕch mơ dro, atŭm hăm ‘nŏh vei sơ đơ̆ng anih tĕch mơ dro tơ mam, Anih vei lăng tĕch mơ dro dêh char Gia Lai kŭm hăm dôm anih jang kơ pal hơ tŏk tơ drong dăr lăng, vei lăng anih tĕch mơ dro. Mă loi, anih kơ chăng dăr lăng. Vei lăng dôm tơ mam yoa kăl vă vei lăng ‘lơ̆ng tơ drong đei yoa ăn bơ ngai răt, tơ gop vei kơ jăp anih tĕch mơ dro tơ mam.

Ƀok Lê Hồng Hà – Kơ dră Anih vei lăng tĕch mơ dro Gia Lai, ăn tơ băt: “Hăm tơ mam răt yoa pơ ma atŭm tơ̆ anih tĕch mơ dro lơ̆m tơ ring mă lơ ‘nŏh jĭ tơ mam đei pơm tơ lĕch lơ̆m tĕh đak. Tơ mam âu pơm lăp hăm tơ drong ‘mĕh vă đơ̆ng kon pơ lei. Mă lei hăm tơ mam xa kơ jă tŏk lơ, 1,2 ‘nu bơ ngai mă lơ ‘nŏh chă tĕch mơ dro hăm gre chơ pơ truh dôm tơ mam, ƀât lăp đei hloi tơ mam ưh ‘lơ̆ng, ưh đei chih hơ dăh anih pơm. Kiơ̆ đơ̆ng dăr lăng nhôn oei ƀôh lơ tơ drong glăi ƀơm truh tơ drong ‘nâu nhen sĭk kok đei răt iŏk ôn đơ̆ng tĕh đak đe, ƀĕnh, keo… Atŭm hăm ‘nŏh hơ tŏk tơ drong dăr lăng hăm dôm tơ mam ƀơm truh tơ drong răt yoa pơ ma atŭm vă tơ tom chă ƀôh păng sek tơ lang tơ păt hăm dôm tơ drong pơm glăi vă vei lăng ‘lơ̆ng tơ drong đei yoa ăn kon pơ lei, anih tĕch mơ dro kŭm nhen bơ ngai răt”.

Hoàng Qui: Chih

Dơ̆ng: Tơ blơ̆