Tơ̆ tơring kơdrơ̆m dơsĭ Quy Nhơn,  hơnih pơgơ̆r lêh pơtơm kơ Sơnăm Tơmang pơhiơ̆ kơ Teh đak - Gia Lai 2026, dôm hơnih oei xa hlôi kơchăng hơlen lăng tôm tơdrong tang găn păng pĭt unh xa. Tơ̆ Anya Premier Hotel Quy Nhơn, khăch sạn hlôi hơlen kơmăi tơroi đei unh xa, hơnih pơih kơdou klenh hơmơt tơdrong hli adoi nhen dôm kơmăi tơpăt unh xa kơtă; jang atŭm hăm Kanh sat tang găn păng pĭt unh xa akŏm dôm trong jang vă tơjră tơtom hăm tơdrong đei ƀôh.

Thượng tá Đậu Văn Huy – Phŏ Kơdră Hơnih Kanh sat Tang găn păng Pĭt unh xa Kŏng an dêh char Gia Lai ră hơdah, tơdrong hơlen kơjăp tơdrong jang tang găn păng pĭt unh xa ưh hơdrô̆ jĭ sơnong jang kơ khul jang kơpal, mă oei jing sơnong jang atŭm kơ rim hơnih jang, rim bơngai jang vă tơgop pơjing um rup Gia Lai jĭ hơnih truh tơmang sơđơ̆ng 'lơ̆ng. Lơ̆m giĕng akŏm pơtơm kơ Sơnăm Tơmang pơhiơ̆ kơ Teh đak 2026 tơ̆ Gia Lai, dêh char kơchĕng gô vă sơng pơhlom  70 rơbou 'nu tơmoi, tơdrong jang vei sơđơ̆ng noh tih tên tơpă. Tơdrong jang kơchăng đơ̆ng hrôih, đơ̆ng hơtaih păng drơ̆ng minh, gô tơgŭm ăn tơmoi sơđơ̆ng jơhngơ̆m ƀơ̆t truh hăm Gia Lai.