VOV4.Bahnar -  Tơ̆ dêh char Gia Lai, pơtho pơhrăm mâm jon, mă kăl ‘nŏh tơ̆ tơring kon kông jĭ toch mơmat tat kơ yuơ mĕ ƀă đe hơ iŏh tim gan hlôh vao tơdrong gĭt kăl lơ̆m tơdrong pơtho ăn kon hơ ‘lơ̆p păng pơtho nơ̆r Yuăn hơdrol kon hơ ‘lơ̆p vă tŏk hŏk lăm 1. Lơm lơ sơnăm kơ au đei pơjao vĭh pơtho tơ̆ hnam trương pơlei Ia Tông, tơ̆ tơring Ia Der, gơnơm chă pơma sa gơ̆h hơgei kơna kô pơtho Ksor H’Nhiêm (tơ̆ hnam trương mẫu giáo 30/4- apŭng Ia Grai)hlôi hơvơn đei 100% ‘nu hơ iŏh mâu yăo năm tơ̆ hnam trương, adoi pơgơr lăm hŏk oei sa tơ̆ kơ ‘năr dơ̆ng lơ̆m hnam trương pơlei dơnuh au. 

Kô pơtho Ksor H' Nhiêm hăm mĕ ƀă hŏk tro pơm tơmam pơchơt vă pơtho hơ iŏh

Mă đơ̆ng pơjoăl hăm tơdrong jang chŭn mir, mă lei rim gơmăng, klo akăn mŏ Rơ Com H’Lai (sơnăm rơnĕh 1993, pơlei Ia Tông, tơring Ia Der, Ia Grai) tơplih dĭh băl atŭm hăm kon drŏ kăn Rơ Com H’Nanh (lăm mâu yăo 4 sơnăm) chă hŏk pơhrăm rim ƀai hŏk mă kô Ksor H’Nhiêm pơtrŭh ăn. Lăp đơ̆ng rŏng chă đŏk lăng mĭnh ƀar ‘măng ƀai pơthođơ̆ng kô H’Nhiêm, mŏ H’Lai koăy video ‘moi kiơ̆ nơ̆r pơtho, pơtrŭh ăn kô pơtho vă kô lăng hơlen. Đơ̆ng khei 9/2021 truh dang ei, kơ yuơ jĭ hơbuh Covid-19, kơna mon H’Nanh hăm 37 ‘nu đe boăl hơ iŏh anai lơ̆m lăm mâu yăo, hnam trương pơlei Ia Tông, tơring Ia Dêr, apŭng Ia Grai oei hơnơ̆ng sơng iŏk đei 5 ƀai hŏk online lơ̆m 1 giĕng. Mă đơ̆ng ư̆h kơ đei tơ ƀơ̆p kơtă kô pơtho, mă lei ‘moi kiơ̆ trong pơtho au, H’Nanh hăm rim boăl oei hơnơ̆ng chă pơma dơnŭh hŏk pơhrăm dĭh băl păng đei kô pơtho H’Nhiêm lăng hơlen kơ jăp tơdrong hŏk pơhrăm. Jĭ mĕ hŏk tro, mŏ H’Lai tôch lăp đon kơ yuơ đơ̆ng blung sơnăm 2021 trŭh dang ei, kon hơ ‘lơ̆p hŏk rơbot lơ ƀai hơri, ƀai hơsoang hle păng rim gơmăng hơnơ̆ng gô chang sơng iok đei ƀai pơtho đơ̆ng kô:“Ĭnh pă đei pơngơ̆t yă kiơ bơih kơ yuơ hlôi đei kô chă pơtho khan, lăng ba, ba năm jang jei hoei chă ƀơ ƀreh. Kon ĭnh hlôi băt đŏk, băt hơri, băt hlôh lơ tơdrong ƀiơ̆ bơih”.

Kô pơtho H'Nhiêm koay phim, pơm video tơgŭm pơtho online

Mŏ Rơ Châm H'Yúi- bơngai vei lăng Khŭl mĕ ƀă hok tro hnam trương mâu yăo pơlei Ia Tông, tơring Ia Dêr, apŭng Ia Grai tơbăt, đunh kơ au 3 sơnăm năm tơ̆ sơ̆, hnam trương mâu yăo lăp đei 1 hơnĭh hnam să dang 50 met vuông hlôi hư răm. Kơ yuơ lơ mĕ ƀă hŏk tro lơ̆m pơlei akhan, hơ ioh đơ̆ng 3-5 sơnăm tim mă hŏk chư, kơna ba hŏk mâu yăo lăp chă pơm ngôi đĕch. Đơ̆ng sơnăm hŏk 2018-2019 trŭh dang ei, kô pơtho H’Nhiêm vĭh tơ̆ au pơtho, ‘moi kiơ̆ rim ‘măng hôp đe mĕ ƀă hok tro, hôp pơlei, kô H’Nhiêm hlôi pơma tơblang hăm nơ̆r Jrai pơm ăn đe mĕ ƀa hlôh vao hơ iŏh mâu yăo năm tơ̆ hnam trương ư̆h khan lăp chă pơm ngôi, mă lei oei hŏk pơhrăm rim tơdrong ăn đe hăp vei lăng năng tông kơ dĭh, hŏk pơhrăm pơma nơ̆r Yuăn păng hŏk pơhrăm chư vă kơ joăt hơdrol vă tŏk lăm 1. Tơdrong mă au tơgŭm ăn hơ ioh bơngai Jrai hlô̆h vao hlŏh ƀiơ̆, hoei chă hơdơ̆ bôl boăl au to. Mŏ Rơ Châm H'Yúi tơbăt:“Sơ̆ hnam trương tim mă ‘lơ̆ng nhen dang ei, dang ei rim kô pơtho chă chă pơrŏ tôch kơ ‘lơ̆ng, đei tôm tơmam drăm hŏk pơhrăm, kơna đe hơ iŏh tôch kơ chhôk. Sơ̆ tim mă đei cham nhen lĕ lơ lau ôh, cham tĕh hŏh, đe hơ iŏh lĕch tơ ‘ngoăih pơm ngôi ‘mê̆ ‘mach. Mă lei đơ̆ng mă đei kô H’Nhiêm năm tơ̆ pơlei Tong ‘nŏh lăm hŏk, cham hnam trương ‘lơ̆ng, rơgŏh, đe hơ ioh chă pơm ngôi hoei ‘mê̆ ‘mach. Nhôn chhôk dêh păng bơnê kơ kô H’Nhiêm vei lăng năng tông, pơtho khan ăn kon ĭnh adoi nhen đĭ đăng đe hŏk tro tơ̆ au”.

Yă Đỗ Thị Nga- Kơdră vĕi lăng Hnam trương Mẫu giáo 30/4, tơring Ia Dêr, apŭng Ia Grai tơbăt, đơ̆ng sơnăm 2018 năm tơ̆ hơdrol sơ̆, tơ̆ hnam trương pơlei Ia Tông lăp đei dang 10 ‘nu hơ iŏh đơ̆ng 3-5 sơnăm năm tơ̆ hnam trương. Mă lei đơ̆ng sơnăm hŏk 2019-2020 trŭh dang ei, lăm hŏk hlôi đei tôm 38 ‘nu hơ iŏh tôm sơnăm hŏk mâu yăo năm hŏk. Tơdrong mă au gơnơm đơ̆ng kô Ksor H’Nhiêm mă đei. ‘Ngoăih jang chă pơrô̆ pơrôp, pơtho tơbăt, cô H’Nhiêm oei jing kô pơtho hơgei lơ̆m apŭng, lơ̆m dêh char lơ̆m lơ sơnăm hŏk hơnơ̆ng. Tơdrong kăl hloh ‘nŏh kô H’Nhiêm hơnơ̆ng lăng kơ jăp chă pơma dơnŭh hăm nơ̆r Yuăn, mă lei dôm tơdrong pơm ngôi ‘nŏh kô pơma ƀar nơ̆r hloi, pơtho tơbăt ăn đe hơ ioh băt dôm tơdrong oei sa ‘lơ̆ng rŏ kơ hơdrung Jrai, pơtĭh gia nhen chĭng chêng, tĭng nĭng chĭng klơk, hơbĕn ao tanh.“Mă kăl, kô H’Nhiêm tôch ‘mêm kơ eng hŏk tro, pơma dơnŭh gơ̆h găt, mă đơ̆ng dang yơ jei chơt hiôk hăm đe hơ ioh, ư̆h kơ đei chă hil hơmrăi au to ôh. Lơ̆m dôm sơnăm hok au ki, kô ‘nŏh jing kô pơtho tơm kơ hnam trương, iŏk đei jing kô pơtho hơgei lơ̆m dêh char, lơ̆m apŭng, jing bơngai đei jơhngơ̆m đon oei sa ‘lơ̆ng hơ iă păng tôch nŏng, hơdrin lơ̆m pơtho pơhrăm. Đơ̆ng sơnăm kô H’Nhiêm vĭh pơtho, tơdrong băt pơma nơ̆r Yuăn, tơdrong gơ̆h tŏk lăm 1 đei hnam trương jăl kơđeh drơ̆ng lăp, hôn bơnê”.

Kô Ksor H’Nhiêm tơbăt, kơdĭh ba ‘mĕh vă tĭh hlŏh ‘nŏh rim mĕ ƀă hŏk tro bơngai Jrai roi năr roi lăng ba kơ jăp tơdrong hŏk pơ hrăm ăn kon hơ ‘lŏp, tơgŭm ăn kôn mon kon sau mŏn roi nar roi đei tơdrong ẻĭh sa hiôk chơt hlŏh ƀiơ̆:“Ĭnh ƀô̆h tơ̆ au oei mơmat tat dêh, hŏk tro năm hŏk tôch tŏ sĕt. Ƀô̆h lơ lŏh kơna ba sơ ‘ngon tôch kơ dêh, ĭnh hơpơi ‘mĕh kôn mon kon sau kon kông năm hŏk, băt chư, băt pơma nơ̆r Yuăn. Đei ŭnh hnam ư̆h kơ ăn kon hơ ‘lơ̆p năm hŏk kơ yuơ ŭnh hnam mơnat tat, kơna ba măh năm chă pơma dơnŭh, tơgŭm djru vă rim đe ŏh đei năm tơ̆ hnam trương, vă đe ŏh hŏk hơgei, băt lơ tơdrong hlŏh dơ̆ng.”.

Dôm tơdrong hơdrin ư̆h pơdơ̆h đơ̆ng kô pơtho Ksor H’Nhiêm ư̆h khan lăp hơdrô̆ mĕ ƀă păng hŏk tro hnam trương mâu yăo pơlei Ia Tông, tơring Ia Dêr, apŭng Ia Grai hôn bơnê, mă lei au ki, dơnŏ anĭh jang pơtho pơhrăm dêh char Gia Lai jei apĭnh athei Dơnŏ anĭh tơm vei lăng Hnam trương pơtho pơhrăm pôk bơnê hơnăn Kô pơtho gơ̆h hơgei sơnăm hŏk 2020-2021.

Bơngai chĭh: Nguyễn Thảo

Tơblơ̆ nơ̆r: Amazưt