VOV4.Bahnar - Đơ̆ng rŏng 3 khei tơ lĕch, tơ drong jang druh dăm năm tơ gŭm pơ yan he 2022 tơ̆ dêh char Gia Lai hlôi tôch hăm lơ tơ drong jang gĭt kăl, hŭt jơ hngâm yoa tơ pôl đơ̆ng đe đoàn viên druh dăm.

Dôm bơ ngai jang tơ gŭm pơ gơ̆r khăm păng ƀơk đĕch pơ gang hơ met jĭ ăn bơ ngai tơ nuh

Tơ drong jang druh dăm năm jang tơ gŭm pơ yan he kơ dêh char Gia Lai đei tơ lĕch đơ̆ng blŭng khei 6 sơ năm ‘nâu, hăm lơ tơ drong jang đei bơ̆ jang hơ nơ̆ng lơ̆m 3 khei pơ dơ̆h he đei: “Roi tơ ƀôh – Tơ gŭm pơ yan thi”, “Pơ yan pơ dơ̆h ƀrê”,  “Pơ kao tơ sing” “Năm bơ̆ jang vei rơ gŏh”, “Pơ yan he rơ gŏh ‘lơ̆ng”. Dôm tơ drong jang âu akŏm tơ̆ dôm xăh sơ lam; dôm xăh, pơ lei pơ la oei adrin jang pơ kĕh tơ drong pơ jing tơ ring tơ rang ‘nao lơ̆m sơ năm 2022 păng anih oei xa, bơ̆ jang, hŏk pơ hrăm đơ̆ng đe đoàn viên, druh dăm, hŏk tro, sinh viên.

Bơ̆ jang tơ drong tơ gŭm, sơ năm mơ lôh Gia Lai hlôi jang đei lơ tơ drong kăl nhen pơm hơ met păng man ‘nao 27km trong tơ̆ tơ ring tơ rang; roi tơ ƀôh jơ hngâm pran, khăm, ƀơk đĕch pơ gang ăn 1400 ‘nu bơ ngai tơ nuh, pơ tăm ‘nao vă jê̆ 170 rơ bâu tơ nơm ‘long; man 6 tŏ hnam tơ gŭm ăn bơ ngai mơ mat tat, bơ ngai đei kŏng; pơ gơ̆r pơ tho tơ ƀôh trong jang xa, khoa hŏk ki thuơ̆t ăn rơ bâu ‘nu druh dăm tơ̆ tơ ring tơ rang.

Dơ̆ng: Tơ blơ̆