VOV4.Bahnar - Sơ năm hŏk ‘nao 2022-2023, anih vei lăng pơ tho pơ hrăm dêh char Gia Lai tŏk bŏk ưh kơ măh hloh 3700 ‘nu thây kô dơ̆ng pơ tho tơ̆ lăm. Tơ̆ hơ năp mơ mat tat âu, lơ trong jang kăl đei rim anih pơ tho pơ hrăm tơ lĕch jang vă vei sơ đơ̆ng ‘lơ̆ng pơ tho păng hŏk.

        Lơ̆m sơ năm hŏk ‘nao âu, Hnam trưng Mầm non Hoa Hồng, pơ lei tơm Pleiku rơ̆ih 850 ‘nu hŏk tro ăn hloh 22 grŭp lăm. Kô Trần Thị Thuỷ, Kơ dră vei lăng Hnam trưng Mần non Hoa Hồng tơ băt, hnam trưng tŏk bŏk ưh kơ măh 15 biên chế kô pơ tho ăn sơ năm hŏk ‘nao kơ na tôch kơ bơ ngơ̆t:

        “ Hrei ‘nâu hnam trưng ‘nao lăp vă tôm ăn 22 ‘nu kô pơ tho vei sơ đơ̆ng ăn 1 ‘nu kô dơ̆ng pơ tho lăm, uơ oei dơ̆ng ‘noh pơ ‘nhŏ ăn hŏk tro 5 sơ năm, uơ oei dơ̆ng kơ sô̆ hŏk tro hnam trưng đơ̆ng 3 truh 4 sơ năm ‘noh hrei ‘nâu kơ sô̆ kô pơ tho tŏk bŏk ưh kơ măh. Nhôn kŭm tŏk bŏk apĭnh anih vei lăng găh pơ tho pơ hrăm păng Anih vei lăng kon pơ lei pơ lei tơm ‘noh đơ̆ng rŏng kơ pơ gơ̆r mơ̆t hŏk blŭng athei vei sơ đơ̆ng đei kô pơ tho vă pơ gơ̆r jang kiơ̆ tơ drong vei lăng rong pơ tho hơ ioh.”

        Ƀok Phạm Văn Đại - Kơ dră anih vei lăng găh pơ tho pơ hrăm apŭng Ia Grai tơ băt: Lơ̆m apŭng đei 46 hnam trưng hŏk hăm hloh 1.200 ‘nu kang ƀô̆, thây kô pơ tho păng bơ ngai jang. Khei ‘năr dang ei, apŭng Ia Grai oei ưh kơ măh vă jê̆ 300 ‘nu thây kô pơ tho, bơ ngai jang. Bơ̆ jang kiơ̆ tơ drong hơ găt đơ̆ng Tơ drong jang pơ tho phô thŏng akŏm đĭ đăng 2018, sơ năm hŏk 2022-2023 gô jing sơ năm mă blŭng môn hŏk nơ̆r Anh păng Tin học jing môn hŏk pơ gŏ đơ̆ng lăm 3 tơ̆ jăl 1, tơ plih yua kơ rơih kơ dih nhen hơ drol sơ̆. Tơ pă yan âu ‘nâu pơm ăn apŭng oei tŏk bŏk ưh kơ măh lơ thây kô pơ tho ‘noh hơ nơ̆ng tơ ƀơ̆p dơ̆ng mơ mat tat ƀơ̆t tam mă pơm lăp tôm kơ sô̆ thây kô vei lăng pơ tho ăn 2 môn âu.

“ Hrei ‘nâu mơ mat tat đơ̆ng anih jang pơ tho pơ hrăm apŭng Ia Grai ‘noh jĭ bơ̆ jang kiơ̆ tơ drong jang hla ar hŏk ‘nao hăm môn anh văn lăm 2 păng tin học lăm 3 dang ei ưh kơ măh. Hăm kơ sô̆ thây kô pơ tho anh văn oei ưh kơ măh lơ lơ̆m 1 hnam trưng hŏk ‘noh oei 5 hnam trưng tam mă đei thây kô pơ tho anh văn păng 8 hnam trưng tam mă đei thây kô pơ tho Tin học kơ na tôch kơ mơ mat tat.”

Vei sơ đơ̆ng kơ sô̆ hŏk tro tơ̆ hnam trưng hŏk ‘noh jĭ 1 trong jang vă pơm lăp hăm tơ drong ưh kơ măh thây kô pơ tho lơ̆m sơ năm hŏk ‘nao tơ̆ Gia Lai

        Kŭm lơ̆m sơ năm hŏk ‘nâu, pơ lei tơm Pleiku ưh kơ măh hloh 600 biên chế thây kô pơ tho tơ̆ dôm jăl hŏk. Ƀok Nguyễn Đình Thức - Kơ dră Anih vei lăng pơ tho pơ hrăm pơ lei tơm Pleiku tơ băt, vă vei sơ đơ̆ng ‘lơ̆ng pơ tho păng hŏk, anih jang găh pơ tho pơ hrăm akŏm lăng kăl truh tơ drong proh hơ met, sơ đơ̆ng dơ̆ng khŭl thây kô pơ tho tơ̆ dôm hnam trưng hŏk. Hơ dai hăm, kiơ̆ lơ̆m biên chế đei pơ jao, kơ chăng chă rơih thây kô pơ tho, bơ ngai jang oei ưh kơ măh.

        “ Anih jang hlôi pơ gơ̆r bơ̆ jang hăm dôm hnam trưng hŏk vă dăr hơ len dơ̆ng hnam trưng, lăm hŏk păng hơ met ăn thây kô pơ tho tơ̆ dôm hnam trưng. Tơ̆ hơ năp tơ drong ưh kơ măh thây kô pơ tho lơ thoi noh ‘noh hlôi pơ ma dơ nuh hăm rim hnam trưng proh hơ met dơ̆ng hnam trưng, lăm hŏk, akŏm tơ gep hnam trưng, lăm hŏk 1 trong tôch ai vă ‘mơ ‘met biên chế đei pơ jao lơ̆m tơ drong kĕ jang. Anih jang kŭm apĭnh rim kơ dră gơh kĭ ăn set hơ len kiơ̆ lơ̆m dôm tơ drong hơ găt đơ̆ng anih jang, đơ̆ng teh đak vă tơ lĕch jang tơ drong pơ tho hŏk.”

        Ƀok Lê Duy Định – Kơ dră chĕp kơ̆l Anih vei lăng găh pơ tho pơ hrăm dêh char Gia Lai tơ băt: Anih vei lăng găh pơ tho pơ hrăm tŏk bŏk jang hơ dai hăm Anih jang Nội vụ bơ̆ jang hăm rim tơ ring vă jô̆ hơ len, jang tơ gŭm Anih vei lăng kon pơ lei dêh char tơ chơ̆t tơ drong klăih song tơ klep hăm proh hơ met, pơ gơ̆r dơ̆ng hnam trưng, lăm hŏk, akŏm hơ dai dôm hnam trưng, hơ tŏk kơ sô̆ hŏk tro 1 lăm truh kơ sô̆ tôch ai kiơ̆ hơ găt đơ̆ng dôm jăl hŏk. Đơ̆ng rŏng kơ jang đang dôm tơ drong tơm mă jô̆ hơ len dơ̆ng tơ drong ưh kơ măh, tôm thây kô pơ tho tơ̆ dôm tơ ring vă pơ gơ̆r klăih song 1.244 tơ drong hơ găt mă Trung ương pơ jao.

        “ Hăm dôm lăm tơ̆ jăl 1 athei 35 ‘nu hŏk tro 1 lăm, oei hăm dôm lăm tơ̆ jăl 2 ‘noh athei 45 ‘nu hŏk tro 1 lăm. Dôm apŭng jang kiơ̆ tơ drong tơ mơ̆t hơ dai dôm hnam trưng kŭm nhen tơ drong vei sơ đơ̆ng kơ sô̆ hŏk tro tơ̆ lăm thoi noh gô ‘mơ ‘met lơ thây kô pơ tho. Mưh đei tơ mơ̆t dơ̆ng biên chế thây kô pơ tho, akŏm dơ̆ng tơ drong tơ mơ̆t hơ dai dôm hnam trưng kŭm nhen hơ met ăn kơ sô̆ hŏk tro tơ̆ lăm ‘noh tơ drong hiôk pơ tho pơ hrăm tơ̆ dêh char Gia Lai gô đei măh thây kô pơ tho dơ̆ng tơ̆ lăm, pă jor tơ drong pơ tho pơ hrăm ‘lơ̆ng kơ dêh char gô đei ‘lơ̆ng hloh”.

Hoàng Qui: Chih

Thuem: Tơ blơ̆