VOV4.Bahnar - Năr 23/2, dêh char Gia lai đei 662 ‘nu bơngai tơpŏh jĭ Covid-19. ‘Nau jing măt bơngai tơpŏh jĭ lơ hlŏh lơ̆m 1 năr tơ̆ dêh char jô̆ đơ̆ng blŭng pơyan jĭ trŭh dang ei.

Mĭnh ‘nu hŏk tro tơ̆ pơlei tơm Pleiku tơpŏh jĭ Covid-19

Kiơ̆ kơ ‘nŏh, pơlei tơm Pleiku ‘nŏh jing tơring đei măt bơngai tơpŏh jĭ lơ hlŏh lơ̆m tơring. Rim apŭng đei măt bơngai tơpoh jĭ lơ dơ̆ng ‘nŏh rim apŭng Chư Păh (67 ‘nu), apŭng Kbang (58 ‘nu), apŭng Chư Prông (50 ‘nu). Ƀok Nguyễn Đình Tuấn - Kơ iĕng Kơdră Dơnŏ anĭh vei lăng jang pơgang dêh char Gia Lai tơbăt, tơdrong tơm pơm ăn ‘nŏh kơ yuơ hơdrol păng lơ̆m năr Têt Nguyên đán, măt bơngai brŏk vĭh tơ̆ dêh char Gia Lai lơ păng đei tơdrong lơ kon pơlei ư̆h kơchăng kơ yuơ hlôi ƀet vaccine. Mă đơ̆ng măt bơngai tơpŏh jĭ Covid-19 tŏk lơ, mă lei hlŏh 94% măt bơngai jĭ păh ai, dăh mă ư̆h kơ ƀô̆h chă chĕp pơgrŭn au to; măt bơngai jĭ ăl ‘nŏh to sĕt; măt bơngai lôch tŏ sĕt. Lơ lŏh, jô̆ đơ̆ng năr 26/4/2021 trŭh năr 23/02/2022, dêh char Gia Lai đei hlŏh 16.900 ‘nu bơngai tơpŏh jĭ SARS-CoV-2. Hrei au đei 45 ‘nu bơngai lôch păng oei hlŏh 1.400 ‘nu bơngai jĭ tŏk bŏk ming hơmet tơ̆ rim hnam pơgang tơring tơ̆ dêh char.

Tơblơ̆ nơ̆r: Amazưt