Pơm kiơ̆ “Tơchơ̆t jang Quang Trung” kơyuơ Thủ tướng teh đak bơ̆n pơtơm, đơ̆ng năr 1/12, rim hơnih linh pơm jang tơ̆ dêh char Gia Lai hlôi drơ̆ng minh pơtơm tơdrong jang tơgŭm pơm 100 tŏ hnam ăn unh hnam kon pơlei mă đei hnam tơglơh tơpăi lơ̆m 'măng 'mi kial đak hơbông ou ki. Lơ̆m tơchơ̆t jang ou, Kuân đoan 34 iŏk pơm 70 tŏ hnam, Anih tơm vei lăng Khul linh dêh char Gia Lai pơm 30 tŏ hnam.

Rim khul jang pơm jang hơdoi kơjăp hăm jơnŭm pơgơ̆r tơring vă hơlen trŏ bơngai đei tơgŭm, hơmet tôm tơmam drăm, bơngai jang, hơnih oei xa păng gre vih vơ̆t ăn rim khul pơm jang. Rim hơnih iŏk jang hơdrin keh đang, pơjao tôm 100 tŏ hnam hơdrol kơ năr 31/1/2026, tơgŭm ăn kon pơlei tơtom sơng Têt Nguyên đán lơ̆m bơbŭng hnam 'nao kơjăp 'lơ̆ng.

Năr 1/12, Kơdră chĕp pơgơ̆r Hơnih vei lăng kon pơlei dêh char Lâm Đồng Hồ Văn Mười pơm tơm hop akom trư̆k tuyên hăm rim tơring, athei tĕnh koăng tơ iung pơjing ming man păng ming hơmet hnam oei ăn dôm ŭnh hnam hjiong răm kơtang lơ̆m ‘măng ‘mi kial hơbŭt hơbông pơrăm ou ki. Lơ̆m dêh char đei 76 pơbŭng hnam hơlih păng 749 pơbŭng hnam hư răm, lơ̆m ou tơring Dran ‘noh tơring răm kơtang hloh hăm 46 pơbŭng hnam hư răm, 17 pơbŭng hnam hơlih păng 6 ŭnh hnam kon pơlei oei tơjê̆ thoong đak kroong Dă Nhim măh yông hăt hot, găh lơ̆m dôm bơngai kăl pơjing ăn hơnih oei sa ‘nao.

Dêh char drơ̆ng mĭnh nơ̆r tơgum djru 120 triu hlak jên hăm mĭnh ŭnh hnam đei hnam hơlih păng 20–40 triu hlak jên ăn rim pơbŭng hnam ming hơmet pơ ‘lơ̆ng; adoi athei rim tơring dăr lăng kơjăp tơdrong iŏk yoa kon jên ƀlep tơdrong păng tĕnh koăng tơchă ăn teh pơm hnam oei ăn rim ŭnh hnam tim mă đei teh; sơđơ̆ng ‘lơ̆ng ăn tơdrong jang ming hơmet hnam oei keh đang hơdrol kơ Têt Nguyên đán 2026.