VOV4.Bahnar - ‘Năr 29/3, apŭng Chư Sê, dêh char Gia Lai pơm lêh hơ pong, pơ dong păng ƀŭ 2 kơ̆l linh lôch tang tĕh đak (tam mă băt hơ năn), đei chă ƀôh tơ̆ pơ gar kơ 1 unh hnam găh plei Phú Cường, xăh Ia Pal. Đơ̆ng rŏng kơ lêh hơ pong păng pơ dong đei pơ gơ̆r tơ̆ Dơ nŏ anih vei lăng kon pơ lei xăh Ia Pal, Lêh ƀŭ 2 kơ̆l linh lôch tang tĕh đak đei pơ gơ̆r tơ̆ Pơ sat linh lôch tang tĕh đak apŭng Chư Sê. Hăm jơ hngâm đon lui yom, kơ dră chĕp kơ̆l đảng, khul kơ dră tơ ring, khul linh păng kon pơ lei tơ̆ apŭng vang sŏh plang nhang, pơ yơ̆r pơ kao tơ ƀôh jơ hngâm đon bơ nê tôch ai hăm tơ drong lôch tang hơ kâu đơ̆ng đe linh ăn tơ drong pơ jing păng vei lăng tĕh đak. 

Khul linh tung, ƀŭ hơ met kơ ting linh lôch tang tĕh đak tơ̆ Pơ sat linh lôch tang tĕh đak apŭng Chư Sê

Adrol kơ ‘nŏh, ‘năr 26/3, Dơ nŏ anih vei lăng kon pơ lei xăh Ia Pal iŏk đei nơ̆r tơ roi chă ƀôh 2 kơ̆l linh lôch tang tĕh đak ƀât mă unh hnam oei chưk hơ met tĕh tơ̆ plei Phú Cường, xăh Ia Pal vă man hnam. Lăp iŏk đei nơ̆r tơ roi, anih jang kơ pal kơ apŭng Chư Sê năm truh, pơ gơ̆r sir akŏm kơ ting 2 ‘nu linh. Hơ len năng hăm dôm nơ̆r tơ roi đơ̆ng kon pơ lei, dôm tơ mam đei chă ƀôh, anih jang kơ pal akhan ‘nâu jĭ kơ ting linh lôch tang tĕh đak lôch lơ̆m tơ drong tơ blăh Mi dŏng tĕh đak; atŭm hăm ‘nŏh pơ gơ̆r iŏk kơ ting vă set hơ len AND kiơ̆ tơ drong hơ găt.

Dơ̆ng: Tơ blơ̆