VOV4.Bahnar - Pơ gê ‘năr 19/5, tơ̆ Cham să Đại Đoàn Kết, Anih jang Đảng, Jơ nŭm pơ gơ̆r kon pơ lei, Anih vei lăng kon pơ lei, Anih jang Mặt trận tổ quốc Việt Nam dêh char Gia Lai pơ gơ̆r lêh dui hơ tŏk hla kơ ƀlep ƀơ̆t tơ băt 132 sơ năm Năr rơ neh kơ ƀok Kơ dră Hồ Chí Minh (19/5/1890-19/5/2022) păng 90 sơ năm Năr pơ jing dêh char Gia Lai (24/5/1932-24/5/2022). Lơ̆m jơ pơ gơ̆r tơ păt, Hla kơ hlôi đei khŭl linh dêh char Gia Lai iŏk mơ̆t lơ̆m hơ nih pơm lêh păng pơ gơ̆r lêh dui hơ tŏk hla kơ.

Jơ pơm lêh dui hơ tŏk hla kơ tơ̆ Cham să Đại Đoàn Kết

Tơ̆ lêh dui hơ tŏk hla kơ teh đak, khŭl linh dêh char Gia Lai hlôi pơ gơ̆r nơ năm pơ rŏ khŭl linh yak brih Anih man rup Ƀok Hồ hăm dôm hơ drĕch hơ drŭng Tây Nguyên. Tơ ƀôh găh 1 khŭl linh pran kơ tang, ưh kơ đei pơ dơh tih pran găh rim tơ drong, ling lang 1 jơ hngơ̆m đon hăm Đảng, hăm tơ drong jang kach mạng kơ hơ drĕch hơ drŭng. Lăp đơ̆ng rŏng kơ lêh dui hơ tŏk hla kơ, kơ dră chĕp kơ̆l dêh char Gia Lai hlôi dan pơ kao, soh nhang ƀlŏk hơ dơ̆r kơ ƀok Hồ pran kơ tang.

Thuem: Tơ blơ̆