VOV4.Bahnar - ‘Năr 8/9, Kŏng an dêh char Gia Lai pơ gơ̆r lêh tơ băt hơ dăh pơ jing păng tơ ƀôh Anih jang pơ ma dơ nuh tang găn ma túy păng pơm glăi klĕch tơ ring sơ lam dêh char Gia Lai. ‘Nâu jĭ anih jang pơ ma dơ nuh mă 22 tơ̆ 15 dêh char đei tơ ring sơ lam kơ teh đak bơ̆n. Dêh char Gia Lai đei vă jê̆ 90 km trong sơ lam, tơ jê̆ hăm dêh char Ratanakiri (teh đak Campuchia), đei ‘Măng jang sơ lam Apŭng plĕnh teh Lệ Thanh, 2 trong pơih, 6 trong iĕ. Tơ ring sơ lam ‘noh jĭ hơ nih chơ chuĕn tơm kơ tơ mam ma tuý, jên tĕch răt ma túy, sem tơ rong bri brăh; tĕch mơ dro păng ba bơ ngai năm kơ jâu jăk glăi.

Kŏng an dêh char Gia Lai iŏk hla ar tơ chơ̆t pơ jing Anih jang pơ ma dơ nuh Tang găn ma tuý păng pơm glăi klĕch tơ ring sơ lam

Yua thoi noh, tơ drong pơ jing anih jang pơ ma dơ nuh vă tang găn tơ drong jang đơ̆ng dôm kơ loăi pơm glăi âu ‘noh tôch kơ kăl. Tơ̆ hơ năp kơnh, Anih jang pơ ma dơ nuh tang găn ma túy păng pơm glăi klĕch tơ ring sơ lam dêh char Gia Lai gô pơ gơ̆r pơ ma đam, drơ̆ng 1 nơ̆r, pơ jing vă tơ lĕch Hla ar Biên bản chih tơ ƀlŏk găh tơ drong jang hơ dai hăm Anih jang tơ̆ dêh char Ratanakiri (teh đak Campuchia); hơ dai hăm ƀrư̆ ƀrư̆ pơ jing lăm jang găh tang găn ma túy păng pơm glăi tơ̆ trong sơ lam tơ̆ tơ ring.

Thuem: Tơ blơ̆