Kơ sơ̆ 4/11, Anih jang đảng dêh char Gia Lai pơ gơ̆r Hop akŏm pơ tôch tơ drong jang kơ sô̆ 38 đơ̆ng Khul kơ dră chĕp kơ̆l đảng dêh char jang kiơ̆ tơ drong tơ chơ̆t  kơ sô̆ 13 – CT/TW đơ̆ng Ban Bí thư găh hơ tŏk tơ drong chĕp kơ̆l pơ gơ̆r đơ̆ng Đảng hăm tơ drong vei lăng păng atŏk tơ iung bri tơ̆ tơ ring. 

Kiơ̆ nơ̆r tơ roi lơ̆m hop akŏm, truh dang ei, Gia Lai hlôi jang đang tơ drong dăr hơ len, hơ met ming tơ drong tơ prŏh trong jang, chĕng hơ met 3 kơ loăi bri truh sơ năm 2025, trong jang truh sơ năm 2030, pơ jing tơ drong ‘lơ̆ng lơ̆m tơ drong vei lăng păng atŏk tơ iung bri tơ̆ tơ ring. Dêh char mong akŏm đei hlŏh 1000 ti hlak jên vă tơ lĕch ăn tơ drong jang vei lăng cham char bri brăh. Dôm anih jang, unh hnam, rim bơ ngai vang pơ tăm đei hlŏh 24.000 ha ‘long bri.

Mă lei, tơ drong vei lăng bri tơ̆ Gia Lai oei đei lơ mơ mat tat yoa jên jang tam mă pơm lăp hăm tơ drong ‘mĕh vă; lơ hơ găt tĕh bri đei đe kŏh phă; tơ drong tơ gar iŏk tĕh bri oei đei lơ, lơ hơ găt tĕh bri ưh kơ ‘lơ̆ng. Dêh char Gia Lai adrin truh sơ năm 2025 pơm hơ tŏk đei yơ̆p ‘long bri truh 47,75%. Rim sơ năm pơ tăm ‘nao 8000 ha bri ‘long păng atŏk tơ iung ‘long pơ gang tơ̆ hơ la yơ̆p ‘long bri.