Pơma tơ̆ jơ pơm lêh, ƀok Phạm Anh Tuấn – Phó Bí thư Đảng dêh char, Kơdră vei lăng kon pơlei dêh char Gia Lai tơchĕng ‘lơ̆ng hơnăp jang đơ̆ng khul linh Công an Gia Lai lơ̆m tơdrong vei kơjăp tơdrong sơđơ̆ng chinh trĭ, sơđơ̆ng lơ̆m tơpôl khei ‘năr âu ki. Atŭm hăm 'nŏh athei đĭ đăng khul linh hơnơ̆ng tưk tơiung hơnăp jang tơm, vang jang hơdoi kơjăp hăm dôm anih jang, khul grŭp, khul kơdră tơring tơlĕch jang ‘lơ̆ng 5 grŭp tơdrong jang tơm. Lơ̆m noh pơma hơdăh nơ̆r athei hlôh vao, vei kơjăp tơdrong sơđơ̆ng tơ̆ tơring, sek tơlang dôm tơdrong krê hơmơt pơm yoch; tang găn sek phak tơpăt bơngai pơm yoch, ưh gơ̆h lê̆ đei tơring krê hơmơt 'nao; ưh gơ̆h hŭt đon kơchăng, lê̆ đei tơdrong ưh ê.

Ƀok Phạm Anh Tuấn pơma hơdăh: “Rim anih jang chinh trĭ lơ̆m dêh char hơtŏk đon kơchăng, jang gơ̆h hơgei, hơbĕch hơbal păng tơnăp ‘lơ̆ng mưh vei lăng sơđơ̆ng tơpôl, vei kơjăp tơdrong sơđơ̆ng tơ̆ tơring, pơjing tơdrong hiôk hian vă pơvih ăn kon pơlei roi đunh roi ‘lơ̆ng. Hơnơ̆ng pơjing păng pơm hơtŏk tơdrong jang đĭ đăng kon pơlei vang vei lăng sơđơ̆ng teh đak, tưk tơiung jơhngâm pran atŭm đơ̆ng rim anih jang chinh trĭ vă vei kơjăp tơdrong sơđơ̆ng, kiơ̆ đơ̆ng noh pơjing tơdrong pơjei băl, pơvih mă ‘lơ̆ng ăn kon pơlei.”

Pơma nơ̆r iŏk tơdrong jang, Thiếu tướng Lê Quang Nhân, Yŏng Công an dêh char Gia Lai ăn tơbăt: khei jang tơm âu vă bơ̆ jangkiơ̆ dôm tơdrong pơtho tôch hơdăh đơ̆ng Anih chĕp kơ̆l Đảng dêh char, Anih vei lăng kon pơlei dêh char Gia Lai păng Anih tơm vei lăng Công an, tơƀôh hơdăh đon pơhnŏng chinh trĭ lơ̆m tơdrong vei lăng sơđơ̆ng 'lơ̆ng tơdrong arih xa kơ kon pơlei, vei kơjăp tơdrong sơđơ̆ng, pơvih ăn tơdrong jang tŏk mŭk drăm, tơpôl tơ̆ tơring.

Đơ̆ng dang ei truh tŏk bŏk khei 9, đĭ đăng khul linh vă akŏm jơhngâm tang găn rim tơdrong yoch krê hơmơt, tơdrong yoch đei khul pơgơ̆r, asong tŏk iŏk jên hăm jên kon lơ, vei lăng ôn bơngai pơm yoch, tĕch ma túy, tơtông klĕ, pơm glăi khôi luơ̆t găh cham char, sir kôch chuơh, tơmam kăp gĭt glăi luơ̆t păng iŏk yoa kơmăy kơmŏk ‘nao vă pơm glăi.

Mĭnh lơ̆m dôm tơdrong ‘nao ‘nŏh jĭ tơdrong Công an Gia Lai pơjing păng pơgơ̆r ăn khul dăr joang atŭm 151 – đei 2 grŭp tơ̆ dêh char păng 135 grŭp tơ̆ xăh, vang dăr joang, răt hơmet tôm tơmam bơ̆ jang, pơgơ̆r bơ̆ jang kơjăp ‘lơ̆ng tơ̆ tơring. Khul linh âu vă sek tơlang kơtang dôm tơdrong glăi pơm tơsŭl tơsăl lơ̆m tơpôl, pơgơ̆r hao thi gre, pơm yoch tơ̆ trong glung păng dôm anih ưh kơ sơđơ̆ng ‘lơ̆ng.

Thiếu tướng Lê Quang Nhân pơma hơdăh: “Đĭ đăng kăn ƀô̆, linh lơ̆m khul linh hơnơ̆ng hơtŏk đon kơchăng tơblăh tơdrŭt, mât 1 ƀơ̆r đon, adrin yak hlŏh rim tơdrong pơmat tat, khŏm jang đang ‘lơ̆ng tơdrong jang đei pơjao, hơnơ̆ng chĕp răk lơ̆m jơhngâm đon bơ̆ jang đĭ jơhngâm yoa teh đak chu hŭt hơkâu, yoa kon pơlei mă pơvih pơvăn, bưng ai jĭ tơdrong kăp gĭt, sĭt hlŏh. Đĭ đăng khul linh công an dêh char vă hơnơ̆ng adrin, hơtŏk hơnăp jang jĭ khul linh tơm lơ̆m tơdrong vei lăng ‘lơ̆ng tơdrong sơđơ̆ng tơpôl, khŏm jang đang ‘lơ̆ng rim tơdrong đei pơjao”.

Đơ̆ng rŏng kơ jơ pơm lêh, lơ kăn ƀô̆, linh vang pơtâp pơrŏ tơdrong hŏk chok, tơblăh phă khul pơm yoch tơƀôh hơdăh jơhngâm pran kơtang mưh iung tơblăh đơ̆ng khul linh Công an kon pơlei. Tơ̆ jơ pơm lêh, Công an dêh char pơgơ̆r ăn lơ gre tih khul linh ‘nao ‘lơ̆ng nhen gre prăh ƀrâm ưh klĕch, gre đei pơm dur barrie, gre pruih đak tơklăh hŭt bơngai iung jreu, gre dŏng bơngai răm, gre chơ yŏng linh tang găn, pĭt unh xa, gre jang roi tơbăt, gre pĭt unh xa, gre chơ kŏ… pơjing jơhngâm hưch hanh, kơchăng bơ̆ jang, iung tơblăh păng dŏng tơgŭm lơ̆m rim tơdrong./.