VOV4.Bahnar - Năr 4/3, Khul drŏ kăn dêh char Gia Lai pơgơ̆r pơm lêh tơlĕch jang sơnăm 2022 păng ‘Măng pơlong tơchă băt Tơdrong tơchơ̆t Pơm lêh hop akŏm kơdră tang măt Drŏ kăn dêh char ‘măng mă XIV (jăl jang 2021-2026). Jang kiơ̆ nơ̆r pơrô̆ đơ̆ng Trung ương Khŭl drŏ kăn Việt Nam, sơnăm 2022, Khŭl kơdră chĕp pơgơ̆r Khŭl drŏ kăn dêh char Gia Lai rơ̆ih tơdrong jang “Tơplĭh ‘nao, tơchăr lơ̆m tơlĕch păng pơgơ̆r jang kiơ̆ Tơdrong tơchơ̆t Pơm lêh hop akŏm kơdră tang măt Drŏ kăn rim hơnĭh” vă tơlĕch jang lơm dêh char.

Lơ̆m tơlĕch jang, Khŭl drŏ kăn dêh char Gia Lai hlôi tơlĕch ‘măng pơlong “Tơchă băt Tơdrong tơchơ̆t Pơm lêh hop akŏm kơdră tang măt Drŏ kăn dêh char ‘măng mă XIV (jăl jang 2021-2026)”. ‘Măng pơlong đei pơgơ̆r đơ̆ng năr 4/3 păng pơtôch năr 4/8, đei pơgơ̆r kiơ̆ trư̆k tuyên, lơ̆m 1 khei 1 ‘măng. Tơdrong apĭnh, tơl hơdăh păng pơtôch rim ‘măng pơlong đei chĭh tơmơ̆t lơ̆m trang thông tin điện tử kơ Khŭl drŏ kăn dêh char Gia Lai.  Kang ƀô̆, rim bơngai lơ̆m khŭl, đe drŏ kăn păng đĭ đăng kon pơlei tŏk bŏk erĭh sa, bơ̆ jang, hŏk pơhrăm păng jang lơ̆m dêh char jei gơ̆h vang pơlong.

Tơblơ̆ nơ̆r: Amazưt