VOV4.Bahnar - Kơsơ̆ năr 12/8, Năr lêh Pơđĭ kon pơlei vang vei lăng sơđơ̆ng tĕh đak sơnăm 2022 đei dêh char Gia Lai pơgơ̆r tơ̆ 2 apŭng Chư̆ Pah păng Phú Thiện. Đơ̆ng blŭng sơnăm trŭh dang ei, tơ̆ dêh char Gia Lai, tơdrong đe pơm glăi yoch tĭh roi tơjur găh ‘măng pơm yoch, măt bơngai lôch păng rơka. Lơ̆m au, ‘măng iung jang pơrăm kĕ khŭl pơm yoch tĭh jơnei 93,5%.

Kơdră Kŏng ang Gia Lai pôk ăn hla bơar hôn bơnê ăn rim bơngai jang ‘lơ̆ng lơ̆m tơdrong jang tơ̆ apŭng Chư̆ Păh

Bơ̆ jang tơ iung pơjing tơdrong jang đĭ đăng kon pơlei vang vei lăng sơđơ̆ưng tĕh đak hơnơ̆ng tơplĭh ‘nao tôm tơdrong, hơvơn đei kơdrơ̆m kon pơlei vang iung jang kiơ̆. Trŭh dang ei, lơ̆m dêh char đei 550 ‘măng khul koeng kơphô̆, pơlei pơla, hnam trương hŏk, hơnĭh bơ̆ jang, hơnĭh mơdro sa hăm hlŏh 50.450 ‘nu bơngai vang jang, tơgop gĭt kăl atŭm hăm khŭl kŏng ang vang iung pơrăm tang găn khŭl yoch; sơđơ̆ng dơ̆ng kơ jăp pơlei pơla. Lơ̆m khei năr kơnh, Dơnŏ anĭh chĕp pơgơ̆r Tang găn khul yoch păng Tơ iung pơjing tơdrong jang Pơđĭ kon pơlei vang vei lăng sơđơ̆ng Tĕh đak dêh char Gia Lai ‘mĕh vă rim hơnĭh jang, tơring tơrang hơnơ̆ng tơ iung pơjing ‘lơ̆ng tơdrong jang tơ̆ tơring, pơrô pơrôp, pơtho khan ăn kon pơlei kơrŭn đĭ jơhngơ̆m vang iung jang tang găn hơlau păng pơrăm kĕ dôm tơdrong pơhlŭ pơhlôm đơ̆ng khŭl kơnê̆ vă pơrrăm tĕh đak; iung jang tang găn khŭl yoch; atok kơtang tơgoăt tơgoăl pôm nơ̆r ƀơ̆r đon kon pơlei pơla.

Tơblơ̆ nơ̆r: Amazưt