VOV4.Bahnar - Pơ gê 14/6, tơ̆ plt Pleiku, dêh char Gia Lai pơ gơ̆r hop akŏm pôk pơ ư bơ ngai plang song pham sơ năm 2022. Kiơ̆ Anih pơ gơ̆r krao hơ vơn plang song pham dêh char Gia Lai, đơ̆ng blŭng sơ năm 2021 truh dang ei, dêh char krao hơ vơn đei 125 ‘măng plang song pham, iŏk đei vă jê̆ 24 rơ bâu tơ pu pham.

Jơ pơm lêh pôk pơ ư bơ ngai plang song pham

Dôm tơ drong jang tih nhen “Lêh pơ yan puih mak ƀrê”, “Năr đĭ đăng kon pơ lei vang plang song pham”, “Dôm kơ tŏh pham pơ yan he”, “Trong yak ƀreu”, sơng đei rơ bâu ‘nu kăn ƀô̆ bơ ngai jang, đoàn viên druh dăm păng kon pơ lei Gia Lai vang akŏm.

Đơ̆ng dang ei truh hơ tuch sơ năm 2022, dêh char Gia Lai hơ nơ̆ng adrin pơ gơ̆r 1 khei đơ̆ng 3 - 4 ‘măng plang song pham, hơ nơ̆ng roi tơ băt, pơ jing khul plang song pham tơ gŭm, dôm grŭp plang song pham. Ƀlep ƀât ‘măng mă âu, Dơ nŏ anih vei lăng kon pơ lei dêh char Gia Lai, Anih pơ gơ̆r krao hơ vơn plang song pham dêh char hơ păh tơ mam ăn dôm khul grŭp, rim bơ ngai păng unh hnam jang ‘lơ̆ng tơ drong plang song pham.

Dơ̆ng: Tơ blơ̆